भूमिगत मेट्रोचे तिकीट आता एका सामायिक कार्डने खरेदी करता येणार आहे. ‘नॅशनल कॉमन मोबिलिटी कार्ड’ (NCAMC) यासाठी वापरता येणार आहे. तसेच त्याद्वारे बेस्टचे तिकीटही काढता येणार आहे. आज, बुधवारी सकाळी 11 वाजल्यापासून या कार्डचा (ticket card) वापर करता येणार आहे.

महाराष्ट्र टाईम्सने दिलेल्या वृत्तानुसार भूमिगत मेट्रो 3 ही आरे जेव्हीएलआर-बीकेसी-आचार्य अत्रे चौक (वरळी नाका) दरम्यान सुरू आहे. ही देशातील 100 टक्के भूमिगत मार्गिका असून, त्याद्वारे दररोज सरासरी 45 हजार प्रवासी ये-जा करतात. या प्रवाशांना आता कार्डद्वारे तिकीट काढता येणार आहे.

यासाठी ही मार्गिका विकसित केलेल्या मुंबई (mumbai) मेट्रो रेल कॉर्पोरेशन लिमिटेडने (mmrc) नॅशनल पेमेंट्स कॉर्पोरेशन ऑफ इंडिया (एनपीसीआय) आणि स्टेट बँक ऑफ इंडिया (एसबीआय) यांच्या सहकार्याने 'रुपे एनसीएमसी' हे कार्ड प्रवाशांसाठी आणले आहे.

या नवीन सुविधेमुळे आता प्रवासी कार्ड वापरून सुलभ प्रवास करू शकतील. यामुळे तिकीट खिडकीवर रांगा टाळता येतील, असे ‘एमएमआरसीएल’ने म्हटले आहे. हे कार्ड टॉप-अप करून रोखीने तिकीट काढण्याऐवजी कार्डने तिकीट काढता येणार आहे.

हे कार्ड मेट्रो (mumbai metro) मार्ग 3 सोबतच मार्ग 2 अ, 7 आणि मार्ग 1 वरदेखील वापरता येणार आहे. हे कार्ड मेट्रो 3 च्या कोणत्याही स्थानकावर उपलब्ध असून स्टेट बँकेच्या शाखांमध्येही मिळेल. हे कार्ड मोफत दिले जात आहे, मात्र वापरासाठी 100 ते 2,000 रुपयांपर्यंतचे अनिवार्य टॉप-अप करणे आवश्यक आहे.

या कार्डचे अनावरण मंगळवारी मुख्यमंत्री देवेंद्र फडणवीस यांच्या हस्ते झाले. यावेळी राज्याचे उपमुख्यमंत्री एकनाथ शिंदे, उपमुख्यमंत्री अजित पवार, महसूलमंत्री चंद्रशेखर बावनकुळे, राज्याच्या मुख्य सचिव सुजाता सौनिक, ‘एमएमआरसीएल’च्या व्यवस्थापकीय संचालक अश्विनी भिडे आणि संचालक (प्रणाली) राजीव यावेळी उपस्थित होते.

हेही वाचा

महाराष्ट्रात दारूच्या किमती वाढल्या

टोल वसुलीत महाराष्ट्र देशात चौथ्या क्रमांकावर