बेकायदेशीर स्थलांतरितांविरुद्धच्या एका मोठ्या मोहिमेत, वसई -विरार (virar) भागात वास्तव्यास असलेल्या एकूण 68 नायजेरियन नागरिकांना त्यांच्या मूळ देशात परत पाठवण्यात आले आहे.

याव्यतिरिक्त, सुरू असलेल्या हद्दपारीच्या (deportation) प्रक्रियेचा एक भाग म्हणून, आणखी 122 जणांना स्थानबद्धता केंद्रांमध्ये (detention centers) हलवण्यात आले आहे, अशी माहिती महाराष्ट्राचे मुख्यमंत्री देवेंद्र फडणवीस (devendra fadnavis) यांनी दिली.

हा मुद्दा विधानसभेत वसईच्या (vasai road) आमदार स्नेहा दुबे पंडित यांनी उपस्थित केला होता. त्यांनी नालासोपारा भागात नायजेरियन (Nigerian) नागरिकांची लक्षणीय उपस्थिती आणि त्यांचा अंमली पदार्थांच्या व्यापारात कथित सहभाग असल्याचे निदर्शनास आणून दिले होते.

याला प्रतिसाद देताना मुख्यमंत्र्यांनी सांगितले की, ज्या परदेशी नागरिकांच्या व्हिसाची मुदत संपली असूनही ते येथे वास्तव्य करून आहेत, त्यांच्यावर त्वरित कारवाई करण्याचे निर्देश पोलिसांना देण्यात आले आहेत.

बेकायदेशीर स्थलांतरितांना आश्रय देणाऱ्या घरमालकांवर कठोर कायदेशीर कारवाई केली जाईल.

देशात वैध कागदपत्रांशिवाय वास्तव्य करणाऱ्या व्यक्तींना ओळखण्यासाठी आणि त्यांचा मागोवा घेण्यासाठी, इमिग्रेशन विभागाच्या (स्थलांतर विभागाच्या) समन्वयाने एक विशेष यंत्रणा विकसित केली जाईल.

बेकायदेशीर कृत्यांमध्ये आणि व्हिसा नियमांच्या उल्लंघनामध्ये सहभागी असलेल्या व्यक्तींना ओळखण्याची आणि त्यांना हद्दपार करण्याची प्रक्रिया वेगवान करण्यात येत आहे, असे आश्वासन मुख्यमंत्र्यांनी विधानसभेला दिले.

हेही वाचा

मध्य रेल्वे उन्हाळी विशेष रेल्वे सेवा चालवणार

खार दांडा कोळीवाडा जमिनीचा वाद मिटवण्याचे हायकोर्टाचे आदेश