मीरा (mira road)-भाईंदर (bhayandar) मनपाच्या महापौरपदासाठी महिला खुला प्रवर्ग आरक्षित झाल्याने भाजपची महिला महापौर विराजमान होणार, हे जवळपास निश्चित झाले आहे.
त्यामुळे शहराचा पुढील महापौर (mayor) कोण होणार? याबाबत राजकीय वर्तुळात चर्चांना उधाण आले आहे.
महिला खुल्या प्रवर्गासाठी आरक्षण जाहीर होताच भाजपमधील (bjp) अनेक नगरसेविकांची नावे चर्चेत आली आहेत.
त्यामध्ये नगरसेविका अनिता पाटील, शानु गोहिल, वर्षा भानुशाली, वंदना पाटील, नीला सोंस, स्नेहा पांडे, दीप्ती भट, नयना म्हात्रे, सुनीता जैन, सुरेखा सोनार, वंदना भावसार आदींचा प्रामुख्याने समावेश आहे.
यामध्ये ज्येष्ठ नगरसेविका म्हणून अनिता पाटील, वंदना पाटील, शानु गोहिल आणि नयना म्हात्रे यांची नावे पुढे येत आहेत.
अनिता पाटील या सलग पाच वेळा नगरसेविका म्हणून निवडून आल्या असून त्यांचा अनुभव लक्षवेधी मानला जात आहे.
तसेच आमदार नरेंद्र मेहता यांच्या भावजय डिंपल मेहता यांचे नावही महापौरपदाच्या शर्यतीत आघाडीवर असल्याची चर्चा आहे. यापूर्वी डिंपल मेहता, ज्योत्स्ना हसनाळे आणि निर्मला सावळे यांनी महापौरपद भूषवले आहे.
मात्र यंदा खुल्या महिला प्रवर्गासाठी आरक्षण जाहीर झाल्याने इतर नगरसेविकांनाही महापौर होण्याची संधी उपलब्ध झाली असून त्यांची स्वप्ने बहरली आहेत.
मीरा-भाईंदर महानगरपालिकेत (mbmc) भाजपची एकहाती सत्ता आहे. एकूण 95 जागांपैकी भाजपकडे 78, काँग्रेसकडे 13, शिवसेना (शिंदे गट) कडे 3, तर 1 अपक्ष नगरसेवक आहे.
त्यामुळे महापौरपदाबाबत भाजप आमदार नरेंद्र मेहता यांचा निर्णय अंतिम मानला जात आहे.
दरम्यान, मागील वेळेस नगरसेविका नीला सोंस यांना महापौर करण्यावरून आमदार नरेंद्र मेहता यांच्यात पक्षांतर्गत वाद झाल्याची चर्चा होती.
मात्र यंदाही नीला सोंस या पुन्हा एकदा महापौरपदाच्या शर्यतीत असल्याचे बोलले जात आहे.
एकीकडे अनुभवी नगरसेविकांचे पारडे जड मानले जात असले, तरी नवख्या महिला नगरसेविकेलाही महापौरपदाची लॉटरी लागू शकते, अशी शक्यताही राजकीय वर्तुळात वर्तवली जात आहे.
हेही वाचा
Share
Tweet
