मुंबईतील पवई परिसरात मिठी नदीवर अत्याधुनिक तंत्रज्ञानाचा वापर करून केवळ ५ महिन्यात पुलाचं बांधकाम पूर्ण करण्यात आले आहे. तब्बल ३४ मीटर लांब आणि २४ मीटर रुंदी असणाऱ्या या नव्या पुलामुळं पूर्व आणि पश्चिम उपनगरांना जोडणारा आणखी एक मार्ग आता वाहतुकीसाठी खुला झाला आहे. पूर्व उपनगरातील पवई फिल्टरपाडा परिसरातून जाणाऱ्या साकी विहार मार्गाद्वारे पश्चिम उपनगरातील आरे कॉलनी परिसरात जाता येते.
या मार्गावरील मिठी नदीवर सन १९४०च्या सुमारास २० मीटर लांबी व सात मीटर रुंदी असणारा पूल बांधण्यात आला होता. धोकादायक ठरल्याने डिसेंबर २०२० मध्ये तो पाडण्यात आला. पूल पाडल्यानंतर नागरिकांची गैरसोय होऊ शकते, ही बाब लक्षात घेऊन पूल पाडण्यापूर्वी या ठिकाणी भराव टाकून एक तात्पुरता रस्ता पर्यायी स्वरूपात बांधण्यात आला. या तात्पुरत्या रस्त्याची उभारणी झाल्यानंतर जुन्या पुलाचे पाडकाम करण्यात आले.
नव्या पुलाचे बांधकाम पावसाळ्यापूर्वी पूर्ण करण्याचे नियोजन पालिकेने केले होते. त्यानुसार अत्याधुनिक तंत्रज्ञान व सुधारित पद्धतींचा वापर करून पुलाचे बांधकाम अक्षरशः दिवसरात्र पद्धतीने करण्यात आले. हे बांधकाम नुकतेच पूर्ण झाले असून हा पूल वाहतुकीसाठी खुला झाला आहे.
या पुलाचे बांधकाम सुरू असताना पालिकेचे संबंधित अधिकारी व कर्मचाऱ्यांपैकी काहींना तसेच या ठिकाणी काम करणाऱ्या कंत्राटदाराच्या कर्मचाऱ्यांना करोनाची लागण झाली होती. मात्र, या आव्हानावर यशस्वीपणे मात करून पुलाचे बांधकाम विक्रमी वेळेत व नियोजनानुसार पावसाळ्यापूर्वी करण्यात आले.
जुन्या पुलाची रुंदी ७ मीटर इतकी होती. नवा पूल २४ मीटर इतका रुंद करण्यात आला आहे. म्हणजे जुन्या पुलापेक्षा हा पूल तिपटीपेक्षा अधिक रुंद आहे. तसेच पुलाची उंचीदेखील जुन्या पुलापेक्षा अधिक आहे. जुना पूल ६ मीटर उंच होता, तर नवीन पुलाची उंची ७ मीटर इतकी आहे. या पुलाच्या दोन्ही बाजूंना पादचाऱ्यांसाठी १.२ मीटर रुंदीचे पदपथदेखील बांधण्यात आले आहेत. पुलाच्या मध्यभागी सुमारे दोन मीटर रुंदीची जागा जलवाहिन्या व अन्य उपयोगी सेवांसाठी सोडण्यात आली आहे. पुलाच्या दोन्ही मार्गिकांच्या दोन्ही बाजूला संरक्षक भिंत बांधण्यात आली आहे.
हेही वाचा -
ओशिवरातील रहिवासी इमारतीला भीषण आग
मुंबईतील 'या' कोविड सेंटरमध्ये आरोग्य कर्मचाऱ्यांचा ‘झिंगाट’ डान्स!
Share
Tweet
