२०२४पर्यंत ब्रिटनमधून महाराष्ट्रात आणणार छत्रपती शिवरायांची 'जगदंबा तलवार'

छत्रपती शिवाजी महाराजांची लंडनमध्ये असलेली तलवार पुन्हा महाराष्ट्रात आणण्यासाठी राज्य सरकारने ठोस पावलं उचलली आहेत.

शिवरायांची 'जगदंबा तलवार' परत मिळवण्यासाठी सरकार ब्रिटनचे पंतप्रधान ऋषी सुनक यांच्याशी संपर्क साधणार आहेत. भाजपचे नेते व राज्याचे मंत्री सुधीर मुनगंटीवार यांनी याबाबत माहिती दिली आहे.

भारतीय वंशाचे ऋषी सुनक ब्रिटनचे पंतप्रधान झाले आहेत. त्यामुळं 'जगदंबा तलवार' पुन्हा भारतात आणण्यात यावी, अशी मागणी करण्यात येत आहे.

सध्या ही तलवार ब्रिटनच्या राणीच्या संग्रहालयात आहे. सुधीर मुनगंटीवार यांनी हा मुद्दा उचलून धरला आहे. तसंच, २०२४पर्यंत शिवरायांची तलवार महाराष्ट्रात परत आणण्यासाठी पाठपुरावा करु,' असे संकेत त्यांनी दिले आहे.

'शिवरायांची हिरेजडीत 'जगदंबा तलवार' ब्रिटिश मोहापायी घेऊन गेले. शिवाजी महाराज विजयादशमीच्या शस्त्रपुजेच्या दिवशी रत्नजडीत 'जगदंबा तलवारी'ची पूजा करायचे. ही तलवार इंग्रज घेऊन गेले.

ऋषी सुनक ब्रिटनचे पंतप्रधान झाले आहेत. ज्यांचा भारताशी संबंध आहे. मी क्रेंद्र सरकारला विनंती केली आहे. तसंच, मी सुनक यांनाही पत्रव्यवहार करणार आहे,' असं मुनगंटीवार यांनी म्हटलं आहे.

''जगदंबा तलवार' ही आमच्या अस्मितेचं प्रतिक आहे. छत्रपती शिवाजी महाराजांच्या स्पर्शाने पावन झाली आहे. ही तलवार महाराष्ट्राला परत करावी, असं पत्र आम्ही केंद्राला पाठवलं आहे. तसंच, ब्रिटनच्या पंतप्रधानांनाही आम्ही विनंती करत आहोत,' असं मुनगंटीवार यांनी म्हटलं आहे.

'शिवराज्याभिषेकाला २०२४ मध्ये साडेतीनशे वर्ष पूर्ण होत आहेत. त्यादृष्टीने राज्य सरकार एक आराखडा तयार करण्यात येत आहे. यासर्व कार्यक्रमात जर ब्रिटनने 'जगदंबा तलवार' दिली तर आमच्यासाठी हा आनंदोत्सव असेल,' असंही सुधीर मुनगंटीवार यांनी म्हटलं आहे.