शीव (sion) रेल्वे उड्डाणपुलाचे पाडकाम आता वेगाने होणार आहे. तसेच दुसरीकडे मध्य रेल्वेने (central railway) पादचारी पूल खुला केल्यामुळे स्थानिकांना पूर्व-पश्चिम ये-जा करणे सोपं झालं आहे.
हा जुना उड्डाणपूल येत्या तीन महिन्यांत पूर्णपणे पाडला जाईल व त्यानंतर नवीन उड्डाणपुलाचे काम सुरू होईल. हे काम जानेवारी 2026 पर्यंत पूर्ण करण्याचे नियोजन आहे.
शीव रेल्वे उड्डाणपुलाच्या पाडकामातील अडथळा आता दूर झाला आहे. मध्य रेल्वेने उड्डाणपुलालगत एक पादचारी पूल उभारला आहे. तसेच तो सर्वसामान्यांसाठी खुला करण्यात आला आहे.
यामुळे उड्डाणपुलाचे (flyover) उर्वरित पाडकाम सुरू होणार आहे. मध्य रेल्वेचे नियोजन आहे की येत्या तीन महिन्यांत संपूर्ण रेल्वे उड्डाणपूल जमीनदोस्त केला जाईल.
पूर्वी शीव रेल्वे उड्डाणपूल बंद असल्यामुळे स्थानिकांना व पादचाऱ्यांना पूर्व-पश्चिम ये-जा करताना खूप त्रास होत होता. वाहनचालक आणि पादचाऱ्यांना लांबचा वळसा घ्यावा लागत होता.
पुलाच्या परिसरात शाळा, महाविद्यालय आणि रुग्णालय असल्याने, पर्यायी व्यवस्था उपलब्ध होईपर्यंत संपूर्ण पूल पाडण्यास स्थानिकांनी तीव्र विरोध केला होता.
स्थानिक आणि इतर पादचाऱ्यांसाठी 56 मीटर लांब आणि 3 मीटर रुंद असा पादचारी पूल उभारण्यात आला आहे. हा पूल आता पूर्ण झाला आहे. स्थानिकांच्या वापरासाठी खुला करण्यात आला आहे.
मध्य रेल्वेचे मुख्य जनसंपर्क अधिकारी डॉ. स्वप्निल निला यांनी सांगितलं की, "शीव रेल्वे उड्डाणपुलाच्या धारावी दिशेकडील पादचारी पुलामुळे प्रवाशांना पूर्व-पश्चिम ये-जा करण्यासाठी पर्याय उपलब्ध झाला आहे."
उड्डाणपुलाच्या दोन मार्गिकांपैकी एक मार्गिका स्थानिकांना ये-जा करण्यासाठी राखीव ठेवण्यात आली होती. आता पादचारी पूल खुला झाल्यामुळे दुसऱ्या मार्गिकेचे तोडकाम सुरू करण्यात येत आहे.
जानेवारी 2026 अखेर पाडकाम पूर्ण करण्याचे नियोजन आहे. त्यानंतर नवा शीव रेल्वे उड्डाणपूल उभारण्यात येईल.
पूर्व द्रुतगती महामार्गाला लाल बहादूर शास्त्री रोड (LBS road) आणि धारावी रोडशी जोडणारा 110 वर्षे जुना शीव रेल्वे पूल (railway flyover) काही वर्षांपूर्वी धोकादायक घोषित करण्यात आला होता.
पुलावरील वाहतूक बंद करण्याची तारीख तीन वेळा बदलण्यात आली होती. अखेर 31 जुलै 2024 च्या मध्यरात्री 12 वाजेनंतर सर्व प्रकारच्या वाहनांसाठी शीव उड्डाणपूल बंद करण्यात आला होता.
हेही वाचा
Share
Tweet
