डोंबिवली पूर्वेतील खंबालपाडा परिसरात असलेल्या शक्ती प्रोसेस कपडा कंपनीला संध्याकाळी पावणे सहाच्या सुमारास भीषण आग लागली. आगीचे कारण अद्याप अस्पष्ट आहे. आगीची माहिती मिळताच अग्निशमन दलाच्या दोन गाड्या तातडीनं घटनास्थळी दाखल झाल्या.
पण आगीची भीषणता पाहता अग्निशमन दलाच्या नऊ गाड्या घटनास्थळी दाखल झाल्या आहेत. आगीवर नियंत्रण मिळवण्याचे काम युद्ध पातळीवर सुरु आहे. सुदैवानं या आगीत कोणतीही जीवितहानी झालेली नाही.
मात्र, आग विजवत असताना अग्निशमन दलाचे कर्मचारी सुभाष भोर हे किरकोळ जखमी झाले आहेत. या आगीत जवळपास सहा कोटी रुपयांचा कपड्यांचा माल जळून खाक झाला आहे.
काही दिवसांपूर्वी सोनारपाडा परिसरात एका गोदामाला आग लागली होती. डोंबिवलीत सातत्यानं आगीच्या घटना घडत आहेत. या घटनांच्या पार्श्वभूमीवर बेकायदा भंगार गोदाम आणि केमिकल कंपन्यांवर कारवाईची मागणी होत आहे. मात्र, प्रशासनाकडून काही ठोस कारवाई होताना दिसत नाही.
हेही वाचा