इमारतीतील फायरफायटिंग सिस्टीम ऑटो मोडऐवजी मॅन्युअल मोडवर ठेवण्यात आल्याचे अग्निशमन दलाच्या तपासणीत समोर आले. त्यामुळे आगीच्या वेळी ही यंत्रणा प्रभावीपणे कार्यरत राहिली नसल्याचे अधिकाऱ्यांनी सांगितले.
या प्रकरणी ‘J-Form’ नोटीस देण्यात आली आहे. फायरफायटिंग उपकरणे पुन्हा कार्यरत मोडमध्ये आणून सर्व अग्निसुरक्षा नियमांचे पालन करण्याचे निर्देश देण्यात आले आहेत.
फायर ब्रिगेडचे सहाय्यक विभागीय अग्निशमन अधिकारी प्रकाश सकपाळ यांनी सांगितले की, आगीचे नेमके कारण अद्याप स्पष्ट झालेले नाही. कुटुंबातील प्रमुख प्रत्यक्षदर्शी हिरेन वटाविया यांची प्रकृती अद्याप चौकशीसाठी योग्य नसल्याने त्यांचा जबाब नोंदवता आलेला नाही.
आगीच्या वेळी आग विझवताना मोठ्या प्रमाणात पाणी इमारतीत शिरल्याने संपूर्ण इमारतीतील वीज आणि पाणीपुरवठा अद्याप बंद आहे.
परवानाधारक खासगी इलेक्ट्रिकल कॉन्ट्रॅक्टर्सकडून संपूर्ण इमारतीतील विद्युत जोडण्या आणि उपकरणांची तपासणी सुरू आहे. फायर सेफ्टी तपासणी पूर्ण होईपर्यंत वीजपुरवठा पूर्ववत केला जाणार नाही, असे अग्निशमन दलाने स्पष्ट केले आहे.
इमारतीची लिफ्टही अद्याप बंद असून Schindler कंपनीच्या कर्मचाऱ्यांकडून तिची तपासणी सुरू आहे.
दरम्यान, आगीत मृत्यू झालेल्या अंकिता छेत्रीचा मृतदेह तब्बल 39 तास बेवारस स्थितीत राहिल्याने पोस्टमॉर्टमला विलंब झाला.
डॉ. आर. एन. कूपर रुग्णालयातील डॉक्टरांच्या माहितीनुसार, कुटुंबातील व्यक्तीने मृतदेहाचा ताबा घेण्यासाठी पुढे येणे आवश्यक होते. अंकिताचे जवळचे कुटुंबीय मुंबईत नसल्याने अखेर तिच्या रक्ताच्या नातेवाईकांनी तिच्या आईच्या NOCसह मृतदेहाचा ताबा घेतला.
गुरुवारी संध्याकाळी साडेपाचच्या सुमारास अंकिताची मामी कमला करखी यांनी मृतदेह ताब्यात घेतला. अंकिता मूळची नेपाळची असून तिचे कुटुंब सिलिगुडीजवळील मालबाजार येथे राहते.
अंकिता ही कुटुंबातील एकमेव कमावती व्यक्ती होती. तिचे दोन्ही भाऊ बेरोजगार असून आई-वडीलही काम करत नसल्याची माहिती तिच्या मामीने दिली.
दरम्यान, सामाजिक कार्यकर्ते राजेश मेहता यांनी दिलेल्या माहितीनुसार, वटाविया कुटुंबाने अंकिताच्या कुटुंबाला आर्थिक मदत करण्याचे आश्वासन दिले आहे.
हेही वाचा
Share
Tweet
