मुंबईतील वादग्रस्त ठरलेल्या हँकॉक पुलाच्या पुनर्बांधणीचा प्रस्ताव मागील अनेक वर्षांपासून रखडलेला आहे. या रखडलेल्या पुलाच्या बांधणीचा मार्ग अखेर सुकर झाला आहे. या पुनर्बांधणीला स्थायी समितीने मान्यता दिल्यानंतर स्थानिक नगरसेविकांना विचारात न घेता याचं श्रेय आपल्या पदरात पाडून घेण्याचा प्रयत्न सभागृहनेते यशवंत जाधव यांनी केला होता. त्यामुळे महापौरांच्या हस्ते हा कार्यक्रम उरकून घेण्याचा प्रयत्न जाधव यांनी केला होता. परंतु, त्यांचा हा प्रयत्नच उधळवून लावत या कार्यक्रमाचेच अध्यक्षपद आपल्याकडे मिळवण्यात स्थानिक काँग्रेस नगरसेविकांनी यश मिळवलं आहे.
हँकॉक आणि कर्नाक या दोन पुलांच्या बांधकामासाठी महापालिकेने निवड केलेल्या कंत्राट कंपन्या काळ्या यादीतील असल्यामुळे त्यांचे प्रस्ताव रद्द करण्यात आले. हा प्रस्ताव रद्द केल्यानंतर आता हँकॉक पुलासाठी नव्याने कंत्राटदाराची निवड करण्यात आली आहे. माझगाव-सँडहर्स्ट रोडमधील शिवदास चापसी येथील हँकॉक पूल हा जुना झाला असून मध्य रेल्वेने तो वापरण्यासाठी असुरक्षित असल्याने तोडून नवीन बांधण्याचा निर्णय घेतला होता. त्यानंतर या पुलाची बांधणी महापालिकेकडून केली जाणार होती. त्याप्रमाणे महापालिकेने निविदा काढून यासाठी कंत्राटदाराची निवड केली होती. परंतु, हे कंत्राटदार काळ्या यादीतील असल्याने न्यायालयाच्या आदेशानुसार त्यांची कंत्राटे बाद करून महापालिकेने नव्याने कंत्राटदाराची नियुक्ती केली.
प्रस्तावाला 2 आठवड्यांपूर्वी मंजुरी
प्रशासनाने आणलेल्या या प्रस्तावाला स्थायी समितीने मागील दोन आठवड्यांपूर्वी मंजुरी दिली. मात्र, या पुलाच्या पुनर्बांधणीचा प्रस्ताव आपण स्थायी समितीच्या बैठकीत मंजूर करून घेतला, असे सांगत याचं भूमिपूजन महापौर विश्वनाथ महाडेश्वर यांच्या हस्ते करण्यात येणार असल्याचे फलक सभागृहनेते यशवंत जाधव यांनी या सर्व भागात लावले होते.
यांना कल्पनाच दिली नाही
मात्र, महापौरांच्या हस्ते होणाऱ्या या प्रशासनाच्या कार्यक्रमात स्थानिक काँग्रेस नगरसेविका सोनल जामसूतकर आणि निकिता निकम यांना कोणतीही कल्पना देण्यात आली नव्हती. कारण या पुलाच्या दोन्ही बाजू या दोनही नगसेविकांच्या प्रभागांमध्ये विभागल्या गेल्या आहेत. त्यामुळे प्रशासनाकडून होणाऱ्या या कार्यक्रमात स्थानिक नगरसेवक हा त्या कार्यक्रमाचा अध्यक्ष असतो, हा नियम आहे. याच नियमांच्या आधारे आमदार अमीन पटेल, माजी विरोधी पक्षनेते ज्ञानराज निकम आणि मनोज जामसूतकर यांनी प्रशासनाला जाब विचारला. त्यानंतर प्रशासनानेही याची दखल घेऊन या कार्यक्रमाच्या अध्यक्षस्थानाचा मान या दोन्ही नगरसेविकांना दिला.
'सत्ताधाऱ्यांच्यापुढे प्रशासन नमतं घेतं'
यशवंत जाधव यांचा प्रभाग नसतानाही ते इतरांच्या प्रभागांमध्ये हस्तक्षेप करत महापालिकेची सर्व विकास कामं आपण मंजूर करून घेत असतो, अशा प्रकारची जाहिरातबाजी करत असतात. सभागृहनेते म्हणून त्यांचा मानसन्मान राखतो. परंतु, स्थानिक नगरसेवक म्हणूनही त्यांनी इतर नगरसेवकांचा सन्मान राखला पाहिजे, हीच आमची यामागची भावना होती. प्रशासनाने याची दखल घेऊन या दोन्ही नगरसेविकांना अध्यक्षपदाचा मान दिला असला तरी तो संघर्ष करून मिळाला आहे. या कार्यक्रमासाठी दोन्ही नगरसेविकांना विश्वासात घेतलेलं नाही. आता १२ तास आधी त्याची निमंत्रण पत्रिका पाठवली जाते. त्यामुळे प्रशासन सत्ताधाऱ्यांपुढे झुकलेलं असून या दोघांचा आम्ही निषेध करत असल्याचं मनोज जामसुतकर यांनी सांगितलं.
दरम्यान, या हँकॉक पुलाच्या पुनर्बांधणीच्या कामाचं उद्घाटन 26 फेब्रुवारीला सकाळी 11 वाजेदरम्यान होणार आहे.
हेही वाचा
हँकॉक पुलाचं काम लवकरच होणार सुरु, रेल्वे कंत्राटदारानं मारली बाजी!