मुंबई महानगर प्रदेशातील मुलुंड, ठाणे, नवी मुंबई आणि कल्याण-डोंबिवलीसह महाराष्ट्रातील वीज ग्राहकांना आता अधिक बिल भरावे लागणार आहे. महाराष्ट्र राज्य वीज वितरण कंपनी अर्थात MSEDCLने वीज दरात Fuel Adjustment Charge (FAC) वाढवला आहे.

नव्या दरानुसार ग्राहकांना युनिटमागे 20 ते 55 पैशांपर्यंत अतिरिक्त शुल्क द्यावे लागणार आहे. महाराष्ट्र वीज नियामक आयोगाच्या (MERC) नियमानुसार वीज खरेदीचा खर्च वाढल्यास वितरण कंपन्यांना तो खर्च ग्राहकांकडून FACच्या माध्यमातून वसूल करण्याची परवानगी आहे.

300 युनिट वापरल्यास 105 अधिक

नव्या FACमुळे घरगुती वीज ग्राहकांच्या बिलातही वाढ होणार आहे.

• 300 युनिट वीज वापरल्यास – सुमारे ₹105 अधिक

• 500 युनिट वीज वापरल्यास – सुमारे ₹250 अधिक

लघुउद्योगांसाठी युनिटमागे 25 ते 35 पैसे, तर दुकाने, मॉल्स आणि इतर व्यावसायिक ग्राहकांसाठी वापरानुसार युनिटमागे 35 ते 60 पैसे अतिरिक्त आकारले जाणार आहेत.

लघुउद्योग मोठ्या प्रमाणात वीज वापरत असल्याने त्यांच्या मासिक बिलात काही हजार रुपयांची वाढ होण्याची शक्यता आहे.

वीज खरेदीचा वाढलेला खर्च ग्राहकांकडून वसूल

MSEDCLच्या अधिकाऱ्यांच्या म्हणण्यानुसार, विविध कारणांमुळे कंपनीला वीज खरेदीसाठी अंदाजापेक्षा अधिक खर्च करावा लागला. विशेषतः वीज खरेदीच्या दरात झालेली वाढ यामागे प्रमुख कारण आहे.

हा अतिरिक्त खर्च FACच्या माध्यमातून ग्राहकांकडून वसूल केला जात आहे. MSEDCLकडून सरासरी 30 पैसे प्रति युनिट FAC आकारला जात असल्याची माहिती अधिकाऱ्यांनी दिली आहे.

म्हणजेच, वीज वापर जितका जास्त, तितका FACचा परिणाम बिलावर अधिक होणार आहे.

हेही वाचा

पाम बीच रोडवर 15 आणि 16 ऑगस्टला वाहतुकीत बदल