Advertisement

सावधान! पुन्हा वाढतोय 'मलेरिया'चा प्रादुर्भाव


सावधान! पुन्हा वाढतोय 'मलेरिया'चा प्रादुर्भाव
SHARES

कोरोना रुग्णांची संख्या वाढत असताना महापालिकेसमोर पुन्हा मलेरिया, गॅस्ट्रो, लेप्टो या आजारांना नियंत्रणात आणण्याचे आव्हान उभं राहिलं आहे. नोव्हेंबरमध्ये आतापर्यंत मलेरियाचे २४९ तर गॅस्ट्रोचे १२७ तर लेप्टोचे २३ रुग्ण आढळून आले आहेत. नियंत्रणामध्ये आलेला मलेरियाचा जोर वाढू नये, यासाठी पालिकेला पुन्हा प्रयत्न करावे लागणार आहेत.

कोरोना संसर्गामुळे पावसाळ्यामध्ये साथीचे आजार नियंत्रणात ठेवण्यासाठी पुरेशी पूर्वतयारी करण्यासाठी वेळ मिळाला नव्हता. तरीही मलेरियाचा संसर्ग वाढवण्यासाठी कारणीभूत असलेली ठिकाणे शोधून काढणे, डासांची उत्पत्तीस्थळे नष्ट करण्यासाठी पालिकेने प्रयत्न केले. थंडीचा जोर वाढल्यानंतर दमा, सर्दी खोकला यासारख्या तक्रारीही वाढत्या आहेत.

कोरोना संसर्गामुळे ताप आणि सर्दी नेमकी कशामुळे झाली आहे, यासंदर्भात सामान्यांच्या मनामध्ये संभ्रम निर्माण होतो, योग्यवेळी वैद्यकीय उपचार घ्यावेत यासाठी पालिका वारंवार आवाहन करूनही तातडीने डॉक्टरांकडे जाण्याची तयारी अजूनही दर्शवली जात नसल्याचा अनुभव वैद्यकीय तज्ज्ञांना येत आहे.

मागील वर्षीच्या तुलनेत या महिन्यामध्ये आकडा कमी असला तरीही मलेरिया, गॅस्ट्रो, लेप्टो या आजारांना नियंत्रणात आणणे गरजेचे आहे. सध्या साथीचे आजार रोखण्यासाठी, तसेच डास प्रतिबंध करण्यासाठी कीटकनाशक विभागाच्या माध्यमातून जंतूनाशक धूरफवारणी, डासांच्या अळ्यांची स्थाने नष्ट करण्याचे काम सुरू आहे.

गत वर्षी मलेरियाचे ४ हजार ३५७ रुग्णांची नोंद झाली होती मात्र एकही मृत्यू नोंदवण्यात आला नव्हता. तर यंदा ४५५३ रुग्ण असून एकाचा मृत्यू झाला आहे. मलेरियाचे २०१९च्या नोव्हेंबर महिन्यात २९९ मृत्यू होते तर यावर्षी ही संख्या २४९ इतकी आहे, लेप्टोचे गेल्यावर्षी ३२ तर यंदा २३ रुग्ण आढळले. गॅस्ट्रोच्या रुग्णांचे प्रमाण गेल्यावर्षी ५३५ इतके होते यंदा ते १२७ आहे. एचवनएनवनच्या ३ रुग्णांची नोंद २०१९ मध्ये झाली होती मात्र यंदा एकाही रुग्णांची नोंद झालेली नाही.

Read this story in English or हिंदी
संबंधित विषय
Advertisement