म्हाडाच्या (mhada) कोकण मंडळातर्फे प्रधानमंत्री आवास योजनेत अल्प उत्पन्न गटातील घरे जाहीर करण्यात आली होती. मात्र, विरार (virar), कल्याण (kalyan) आणि ठाण्यातील (thane) अल्प उत्पन्न गटातील घरांना सोडतीत (lottery) अल्प प्रतिसाद मिळत आहे. त्यामुळे आता म्हाडाच्या कोकण मंडळातर्फे ही घरे (flats) प्रथम येणाऱ्यास म्हणजेच प्रथम प्राधान्य तत्वावर दिली जाणार आहेत.

त्यासाठी म्हाडाच्या कोकण मंडळाकडून मोहीम राबवली जाणार आहे. विविध ठिकाणी 29 स्टॉलच्या माध्यमातून या घरांविषयी माहिती दिली जाणार आहे.

2 डिसेंबर ते 11 डिसेंबर या कालावधीत यासाठी अर्ज करता येणार आहे. विरार येथील बोळींज, कल्याण तालुक्यातील खोणी आणि शिरढोण आणि ठाणे तालुक्यातील गोठेघर व भंडार्ली येथे 14 हजार 047 घरे उपलब्ध आहेत.

म्हाडा कोकण मंडळातर्फे पंतप्रधान आवास योजनेच्या माध्यमातून अनेक घरे बांधून तयार आहेत. अल्प उत्पन्न गटातील या घरांसाठी 12 ऑक्टोबर 2024 रोजी जाहिरात प्रसिद्ध करण्यात आली होती.

मात्र त्याचवेळी विधानसभा निवडणुकांसाठी लागलेली आचारसंहिता आणि जाहिरातीस मर्यादा आल्याने या घरांच्या जाहिरातीकडे अनेकांनी पाठ फिरवली. त्यामुळे या घरांना प्रतिसाद मिळाला नाही.

त्यामुळे या योजनेतील 14 हजार 047 घरे लोकांचा प्रतिसाद न मिळाल्याने पडून आहेत, अशी माहिती कोकण मंडळातर्फे देण्यात आली आहे. त्यामुळे या घरांची विक्री करण्यासाठी आता म्हाडा कोकण मंडळाने पुन्हा एकदा नवी मोहिम हाती घेतली आहे.

येत्या 2 डिसेंबर ते 12 डिसेंबर 2024 या काळात म्हाडाच्या कोकण मंडळातर्फे विशेष मोहिम राबवण्यात येणार आहे. आता प्रथम येणाऱ्यास प्रथम प्राधान्य या तत्त्वावर ही घरे विक्री केली जाणार आहेत.

वसई-विरार महानगरपालिका हद्दीतील विरार-बोळींज आणि ठाणे जिल्ह्यातील कल्याण तालुक्यातील मौजे शिरढोण, मौजे खोणी, तसेच मौजे भंडार्ली, मौजे गोठेघर येथे ही घरे उपलब्ध आहेत.

या अभियानांतर्गत म्हाडाचे कर्मचारी नागरिकांना गृहप्रकल्पांची माहिती देणार आहेत. तसेच, म्हाडाच्या या योजनेतील घरांसाठी नोंदणी व अर्ज करण्यासंदर्भात मार्गदर्शन देखील करणार आहे.

कोकण गृहनिर्माण व क्षेत्रविकास मंडळाच्या मुख्य अधिकारी श्रीमती रेवती गायकर यांनी नागरिकांना, हक्काच्या घराचे स्वप्न साकार करण्याकरिता या मोहिमेत सहभागी होण्याचे आवाहन केले आहे.

म्हाडा कोकण मंडळातर्फे घरांची माहिती https://lottery.mhada.gov.in/  या संकेतस्थळावर देण्यात आली आहे. तसेच तेथे विक्रेत्यांना नोंदणीही करता येणार आहे.

सोबतच मंडळातर्फे आता विविध 29 ठिकाणी स्टॉल उभारण्यात आले असून तेथे म्हाडाच्या कोकण मंडळाचे कर्मचारी या योजनेबद्दल माहिती देतील.

वसई- विरार, मीरा- भाईंदर, उल्हासनगर, नवी मुंबई, कल्याण- डोंबिवली, ठाणे आणि पालघर महापालिकांच्या कार्यालयात, तहसिल कार्यालयात आणि  उपविभागीय कार्यालयात हे स्टॉल लावण्यात आले आहेत.

हेही वाचा

दक्षिण मुंबईत 5 डिसेंबरला वाहतुकीत बदल, 'हे' मार्ग वळवले

बुधवार ठरला मुंबईतील सर्वात उष्ण दिवस