हा उड्डाणपूल पूर्वेकडील रामकृष्ण चेंबूरकर मार्ग आणि पश्चिमेकडील लालबहादूर शास्त्री (LBS) मार्ग यांना जोडणार आहे. तसेच मध्य रेल्वे मार्गावर सुमारे 100 मीटरचा पूल असून, विद्याविहार रेल्वे स्थानकाच्या पदपथांनाही थेट जोडणी मिळणार असल्याने पादचाऱ्यांचीही मोठी सोय होणार आहे.
बीएमसीच्या पूल विभागातील एका वरिष्ठ अधिकाऱ्याने सांगितले की, "दोन स्पॅनचे काँक्रीट कास्टिंग वगळता उर्वरित सर्व काम पूर्ण झाले आहे. उर्वरित काम पूर्ण झाल्यानंतर लोड टेस्ट आणि तांत्रिक सुरक्षा तपासण्या करूनच पूल वाहतुकीसाठी खुला केला जाईल."
उड्डाणपूल सुरू झाल्यानंतर वाहतूक कोंडी होऊ नये यासाठी बीएमसीने पुलाच्या दोन्ही बाजूंच्या जोडरस्त्यांचे रुंदीकरण सुरू केले आहे.
अतिरिक्त महापालिका आयुक्त (प्रकल्प) अभिजित बांगर यांनी कामाचा आढावा घेत संबंधित अधिकाऱ्यांना वाहतूक अडथळे, प्रभावित आस्थापना, पदपथ आणि झाडांशी संबंधित प्रश्न तातडीने सोडवण्याचे निर्देश दिले आहेत.
तसेच वाहतूक पोलिसांच्या समन्वयाने स्वतंत्र ट्रॅफिक मॅनेजमेंट प्लॅन तयार करण्यात येत आहे.
या उड्डाणपुलाची संकल्पना 1991 मध्ये मांडण्यात आली होती. 2016 मध्ये प्रकल्पाला गती मिळाली आणि 2018 मध्ये प्रत्यक्ष कामाला सुरुवात झाली.
मूळ नियोजनानुसार हा पूल 2022 च्या मध्यापर्यंत पूर्ण होणे अपेक्षित होते. मात्र, कोविड-19 महामारी आणि आराखड्यातील बदलांमुळे प्रकल्पाला विलंब झाला. फेब्रुवारी 2024 मध्ये AB Infrabuild Limited कंपनीला कामाचा आदेश देण्यात आला. अनेक मुदतवाढीनंतर या प्रकल्पाचा खर्च वाढून 178.93 कोटी रुपयांपर्यंत पोहोचला आहे.
हा उड्डाणपूल सुरू झाल्यानंतर विद्याविहार पूर्व ते पश्चिम प्रवासासाठी सध्या पीक अवर्समध्ये लागणारा 40 ते 45 मिनिटांचा वेळ केवळ 10 ते 15 मिनिटांवर येण्याची अपेक्षा आहे.
मध्य रेल्वे मार्गावर उभारण्यात आलेला हा 612 मीटर लांबीचा, चार पदरी उड्डाणपूल असून त्यामध्ये 100 मीटरचा रेल्वे स्पॅन आहे. मुंबईतील रेल्वे मार्गावरील सर्वात लांब गर्डर्सपैकी हा एक मानला जातो. या पुलातील प्रत्येक गर्डरचे वजन सुमारे 1,100 मेट्रिक टन आहे.
हेही वाचा
Share
Tweet
