छत्रपती शिवाजी महाराज टर्मिनस (CSMT) पुनर्विकास प्रकल्पास सध्या मोठा अडथळा निर्माण झाला आहे. या 2,450 कोटी रुपयांच्या महत्त्वाकांक्षी प्रकल्पासाठी आवश्यक असलेले ‘जिप्सम’ साहित्य सध्या उपलब्ध होत नसल्याने कामावर परिणाम होत आहे.

रेल लँड डेव्हलपमेंट अथॉरिटी (RLDA) कडून सांगण्यात आले की, जिप्सम हे साहित्य सौदी अरेबियातून आयात केले जाते. मात्र इराण-अमेरिका/इस्रायल युद्धामुळे पुरवठा साखळी विस्कळीत झाली असून जिप्समसह इतर बांधकाम साहित्याच्या किमतीतही मोठी वाढ झाली आहे. त्यामुळे CSMT येथील सेंट्रल रेल्वे मुख्यालयातील कार्यालयांच्या सुशोभीकरणाच्या कामात विलंब होत आहे.

जिप्सम बोर्ड्सचा वापर आधुनिक कार्यालयीन इंटिरियरमध्ये मोठ्या प्रमाणावर केला जातो. फॉल्स सीलिंग, पार्टिशन, डेकोरेटिव्ह भिंती यासाठी हे साहित्य उपयुक्त ठरते. यामुळे उष्णता नियंत्रण, आर्द्रता प्रतिरोधकता आणि अग्निरोधकता यांसारखे फायदे मिळतात. मात्र सध्या या साहित्याच्या तुटवड्यामुळे कामे रखडली आहेत.

दरम्यान, CSMT पुनर्विकास प्रकल्पाचे एकूण 21.5 टक्के काम पूर्ण झाले आहे. सध्या पी. डी’मेलो रोडकडील प्लॅटफॉर्म 18 परिसरात काम सुरू असून एलिव्हेटेड डेकचे बांधकाम करण्यात येत आहे. हा डेक प्लॅटफॉर्म 1 पर्यंत जोडला जाणार आहे.

या प्रकल्पासाठी 1 फेब्रुवारीपासून 85 दिवसांचा मेगा ब्लॉक घेण्यात आला असून तो 26 एप्रिलपर्यंत सुरू राहणार आहे. प्लॅटफॉर्म 16 आणि 17 वरील पायाभूत कामांसाठी हा ब्लॉक आवश्यक आहे. या काळात या प्लॅटफॉर्मवरून लांब पल्ल्याच्या गाड्या चालणार नाहीत आणि काही गाड्या दादर आणि ठाणे येथेच थांबवल्या जात आहेत.

युनेस्को जागतिक वारसा स्थळ असलेल्या CSMT चे रूपांतर आधुनिक, विमानतळासारख्या ट्रान्झिट हबमध्ये करण्यात येणार आहे. मात्र त्याचवेळी त्याची व्हिक्टोरियन गॉथिक वास्तूशैली जतन केली जाणार आहे.

या प्रकल्पांतर्गत स्वतंत्र आगमन-प्रस्थान विभाग, मोठा कॉन्कोर्स, आधुनिक प्रवासी सुविधा, 700 पेक्षा जास्त वाहनांसाठी मल्टी-लेव्हल पार्किंग, शॉपिंग आर्केड, रेस्टॉरंट्स आणि रिटेल स्पेस उभारण्यात येणार आहेत. तसेच ‘रेल-ओ-पोलिस’ नावाचा एलिव्हेटेड डेक आणि स्कायवॉक सर्व प्लॅटफॉर्मना जोडणार आहे.

हा संपूर्ण प्रकल्प 2027-28 पर्यंत पूर्ण करण्याचे लक्ष्य ठेवण्यात आले आहे. मात्र जागतिक परिस्थितीमुळे निर्माण झालेल्या अडचणींमुळे कामाच्या गतीवर काही प्रमाणात परिणाम होण्याची शक्यता व्यक्त करण्यात येत आहे.

हेही वाचा

दादर स्थानकावर नवीन प्लॅटफॉर्म उभारण्यात येणार

गोरेगावमध्ये ‘नो पार्किंग झोन’ जाहीर