मुंबईच्या किनाऱ्याजवळील हाजी अली दर्गा येथे जगातील सर्वात उंच राष्ट्रीय ध्वज उभारण्याचा प्रस्ताव महाराष्ट्र सरकारकडे सादर करण्यात आला आहे, अशी माहिती रविवारी ट्रस्टी सुहैल खंडवानी यांनी दिली.

वरळी किनाऱ्यापासून सुमारे 500 मीटर अंतरावर असलेल्या छोट्या बेटावर हाजी अली दर्गा आहे. येथे 15व्या शतकातील सुप्रसिद्ध सूफी संत पीर हाजी अली शाह बुखारी यांची समाधी आहे. भारतातील महत्त्वाच्या आध्यात्मिक स्थळांपैकी एक मानल्या जाणाऱ्या या दर्ग्यात दरवर्षी लाखो भाविक भेट देतात.

सुहैल खंडवानी यांनी सांगितले की, या ध्वजस्तंभासाठी विशेष पाइलिंग तंत्र आणि उच्च दर्जाचे धातू वापरले जाणार आहे. “हा परिसर समुद्राजवळ असल्यामुळे त्यानुसार मजबूत रचना करावी लागेल,” असेही त्यांनी स्पष्ट केले.

सुहैल खंडवानी, ट्रस्टी – हाजी अली दर्गा आणि माहिम मखदूम शाह बाबा दर्गा
“हाजी अली दर्ग्याला भारताच्या इतिहासात अत्यंत महत्त्वाचे स्थान आहे. हा दर्गा श्रद्धा, सर्वसमावेशकता आणि सामुदायिक ऐक्याचे प्रतीक आहे. आता या छोट्या बेटावर जगातील सर्वात उंच राष्ट्रीय ध्वज उभारण्याची योजना आहे. त्यासाठी आम्ही महाराष्ट्र सरकारकडे परवानगीसाठी प्रस्ताव सादर केला आहे.”

दरम्यान, हाजी अली दर्गा ट्रस्ट आणि माहिम मखदूम शाह बाबा दर्गा ट्रस्ट यांच्या संयुक्त विद्यमाने आणि लेजेंड ग्रुपच्या सहकार्याने विशेष सेहरी कार्यक्रम आयोजित करण्यात आला होता. या कार्यक्रमात हिंदू, मुस्लिम, ख्रिश्चन, पारशी, शीख आणि बौद्ध धर्मगुरूंनी सहभागी होत धार्मिक सलोखा आणि ऐक्याचा संदेश दिला.

हाजी अली दर्ग्यावर उभारण्यात येणाऱ्या या राष्ट्रीय ध्वजामुळे मुंबईतील या ऐतिहासिक आणि धार्मिक स्थळाचे महत्त्व आणखी वाढण्याची अपेक्षा व्यक्त केली जात आहे.

हेही वाचा

कोस्टल रोडवर वाजणाऱ्या ‘जय हो’ गाण्यामुळे स्थानिक त्रस्त