विनयभंग प्रकरणी रिक्षा चालकाला अटक

कांदिवलीच्या हनुमाननगर परिसरात राहणाऱ्या महिलेनं २९ जुलैला रात्री १०.३० वाजताच्या सुमारास स्टेशनला जाण्यासाठी पकडली. त्यावेळी आरोपी रिक्षाचालक प्रवासादरम्यान रिक्षाच्या आरशात महिलेला पाहून गैरवर्तन करत होता. सुरूवातीला महिलेनं दुर्लक्ष केलं. मात्र, चालकानं स्वत:ला आवर न घालता त्याचे चाळे वाढू लागले. त्यावेळी महिलेनं तो सर्व प्रकार मोबाइलमध्ये कैद करून मुंबई पोलिसांच्या ट्विटर हँडलवर ट्विट केलं. 

या घटनेची माहिती मिळताच पोलिसांनी संबधित कांदिवली पोलिसांकडे तक्रार वर्ग केला. कांदिवली पोलिसांनी सीसीटिव्हीच्या मदतीनं रिक्षाचालकाचा शोध घेण्यास सुरूवात केली. पोलिसांनी शेकडो सीसीटिव्ही तपासल्यानंतर रिक्षा चालकाला पोलिसांनी शोधून काढत त्याला ३५४(अ), ५०९ भा.द.वि कलमांतर्गत  गुन्हा नोॆदवत अटक केली. आरोपीचे नाव अद्याप समजू शकले नसून बातमीला एका वरिष्ठ अधिकार्याने दुजोरा दिला.