मुंबई विद्यापीठाने हाती घेतलेले हा एक नवीन उपक्रम असून याद्वारे विद्यार्थी, प्राध्यापक आणि नवसंशोधकांना त्यांच्या नवसंकल्पनांतून उद्योगनिर्मितीसाठी हक्काचं व्यासपीठ उपलब्ध होणार आहे. स्टार्ट अप इंडिया, मेक इन इंडिया, मेड इन इंडियाच्या अनुषंगाने नव उद्योजकांमध्ये आत्मनिर्भरतेचा मार्ग प्रशस्त करण्यासाठी विद्यापीठाने टाकलेले हे एक महत्त्वाचे पाऊल आहे.
- प्रोफेसर सुहास पेडणेकर, कुलगुरू, मुंबई विद्यापीठ
बुधवारी राजभवन येथे आयोजित करण्यात आलेल्या कार्यक्रमात मान्यवरांच्या हस्ते मुंबई विद्यापीठाला इरादा पत्र देण्यात आलं असून महाराष्ट्र स्टेट इनोव्हेटिव्ह स्टार्टअप पॉलिसी-२०१८ च्या अनुषंगानं विद्यापीठानं हे महत्त्वपूर्ण पाऊल टाकलं आहे.
विस्तृत योजना तयार
मुंबई विद्यापीठातील विद्यार्थ्यांना तसंच प्राध्यापकांना नवोन्मेषी स्टार्टअप धोरणाच्या अनुषंगाने विद्यापीठाने विस्तृत योजना तयार केली आहे. या योजनेअंतर्गत विद्यापीठाने रिनीवेबल एनर्जी, पॉलीमर्स आणि मॅग्नेटिक मटेरिअल, बायोटेक्नॉलॉजी, फार्मासीटीक्यूल, फिनटेक, आर्टिफिशिअल इंटेलिजंस, इन्फॉर्मेशन टेक्नॉलॉजी, अशा क्षेत्राची निवड केली आहे.
यासाठी विद्यापीठ कटीबद्ध
विद्यापीठाच्या ग्रीन टेक्नोलॉजी या इमारतीमध्ये सुमारे १० हजार स्वेअरफूटाच्या क्षेत्राफळामध्ये इन्क्युबेशन सेंटरची उभारणी केली जाणार आहे. विद्यार्थी, प्राध्यापक, आणि संशोधकांमध्ये उद्योजकता संस्कृती वाढवणे, विशिष्ट क्षेत्र आणि डिझाइन उत्पादनांमधील विकास प्रक्रियांचा आरंभ करणे, आर्थिक तसंच पायाभूत सुविधा उपलब्ध करून देण्यावर विद्यापीठाचा भर असून यासाठी सेक्शन-८ कंपनी अॅक्टच्या अनुषंगानं ही संपूर्ण प्रक्रिया राबवण्यात येणार आहे. त्याचबरोबर संलग्नित कॉलेज, विद्यापीठ आणि सहयोगींमध्ये क्रॉस-नेटवर्किंगद्वारे औद्योगिक संकल्पना वाढीस लावण्यास मार्गदर्शन मिळणार आहे. या केंद्राच्या माध्यमातून इन्क्यूबेटीने विकसित केलेल्या संकल्पनेचा पुरावा सुरक्षित करण्यासाठी कायदेशीर आणि आयपीआर बद्दल मार्गदर्शन उपलब्ध करून देण्यासाठी विद्यापीठ कटीबद्ध असणार आहे.
नव उद्योगासाठी पायाभूत सुविधा
सध्या विद्यापीठाकडे ग्रीन टेक्नॉलॉजी येथे ५० हजार स्क्वेअर फूट आणि नॅनो सायन्स विभागात ८ हजार स्क्वेअर फूट जागा उपलब्ध आहे. तसंच ६० कोटीचे उच्च दर्जाचे तंत्रज्ञान विद्यापीठाकडे उपलब्ध आहे. विद्यापीठाच्या विविध विभागाचे १५० हून अधिक पेटंट आणि विद्यार्थी व प्राध्यापकांच्या संकल्पना तसेच अविष्कारच्या माध्यमातून येणाऱ्या विविध संकल्पनांना वेगळं स्वरुप या इन्क्युबेशन सेंटरमुळे मिळणार आहे. नव उद्योगासाठी लागणाऱ्या सर्व पायाभूत सुविधा विद्यापीठाकडून उपलब्ध करून दिल्या जाणार आहेत.
इन्क्युबेशन सेंटरसाठी...
आजच्या घडीला विद्यापीठाच्या अनेक संस्था आणि विभागांबरोबर विद्यापीठाचे इंडस्ट्री लिंकेज असून या नव उद्योजक संकल्पनांसाठी अनेक नामांकित संस्था आणि उद्योग समुहांनी सहकार्य आणि मार्गदर्शन करण्यासाठी पुढाकार घेतला आहे. या संपूर्ण प्रक्रियेला कार्यान्वित करण्यासाठी विद्यापीठाच्यावतीने इन्क्युबेशन सेंटरसाठी लवकरच मुख्य कार्यकारी अधिकारी यांची नेमणूक केली जाणार आहे.