वडाळा-घाटकोपर-ठाणे-कासारवडवली या मेट्रो ४ प्रकल्पाचं काम लवकरच हाती घेण्यात येणार आहे. त्यातच ठाणे-कल्याण-भिवंडी या मेट्रो ५ मार्गाला मंगळवारी मंत्रीमंडळाच्या बैठकीत मंजुरी देण्यात आली. या मंजुरीमुळे मुंबईकरांसोबतच ठाणे, कल्याण आणि भिवंडीकरांचं मेट्रो रेल्वेचं स्वप्न प्रत्यक्षात उतरणार आहे.
दुसरीकडे मुंबईकरांसाठीही एक खुशखबर आहे. ती म्हणजे मंत्रीमंडळाच्या बैठकीत लोखंडवाला-जोगेश्वरी-विक्रोळी-कांजुरमार्ग या मेट्रो ६ प्रकल्पालाही हिरवा कंदील दाखवण्यात आला आहे. या दोन्ही मेट्रो प्रकल्पांना मंजुरी मिळाल्याने आता या प्रकल्पांच्या बांधकामासाठी निविदा काढण्याची प्रक्रिया लवकरच राबवण्यात येणार असल्याची माहिती एमएमआरडीएतील वरिष्ठ अधिकाऱ्याने 'मुंबई लाइव्ह'ला दिली.
मुंबई महानगर प्रदेशात अत्याधुनिक पायाभूत सुविधांचा विकास करण्यासाठी मुंबई महानगर प्रदेश विकास प्राधिकरणा (एमएमआरडीए)ने मेट्रो प्रकल्प हाती घेतला आहे. त्यानुसार मुंबईसह मुंबई महानगरात मेट्रोचे जाळे विणण्यात येत आहे. मुंबईत मेट्रो १ कार्यान्वित झाली असून येत्या ४ ते ५ वर्षांत मेट्रो ३, मेट्रो ७ आणि मेट्रो २ अ मुंबईकरांच्या सेवेत दाखल होतील.