बालरंगभूमीसाठी अविरत काम करणाऱ्या जेष्ठ रंगकर्मी सुधा करमरकर (८३) यांचं हृदयविकाराच्या झटक्यामुळे सोमवारी सकाळी निधन झालं. त्यांनी संपूर्ण आयुष्यभर बालरंगभूमीची सेवा केली. याचबरोबर 'लिटील थिएटर' या बालरंगभूमीच्या चळवळीचीही स्थापना केली. या कार्यात त्यांच्याबरोबर अभिनेत्री सुलभा देशपांडे, दिग्दर्शक विजय केंकरे यांची साथ त्यांना मिळाली. प्रामुख्याने अाविष्कार आणि छबिलदासमध्ये त्यांनी बालरंगभूमीसाठी मोठं काम केलं. नाट्य शिक्षण घेण्यासाठी त्या परदेशात गेल्या. त्यांनी अमेरिकेत जाऊन बालरंगभूमीचा अभ्यास केला. आणि भारतात परत आल्यावर 'लिटील थिएटर'ची स्थापना केली.
त्या नाटकाबरोबरच नृत्यातही पारंगत होत्या. भरतनाट्यम हा नृत्यप्रकारही त्या शिकल्या. मो. ग. रांगणेकरांच्या 'रंभा' या पुनर्जन्मावर आधारित नाटकात त्यांनी नृत्यांगणेची भूमिका साकारली होती.
१९५९ साली पहिल्यांदा रंगभूमीवर बालनाट्य या संकल्पनेचा उदय झाला. सुधा करमरकर यांनी आपल्या पहिल्यावहिल्या 'मधुमंजिरी' बालनाट्यात चेटकिणीची भूमिका केली आणि ती खूप गाजलीही. या नाटकाचं लेखन रत्नाकर मतकरी यांनी केलं होतं. तर सुधा करमकर यांचे वडील तात्या अमोणकर यांच्या 'साहित्य संघ' या नाट्यसंस्थेने या नाटकाची निर्मिती केली होती.
सुधाताईंनी रत्नाकर मतकरी आणि इतरही काही नाटककारांकडून नाटके लिहून घेतली. ती शाळांच्या हॉलमध्येच नव्हे, तर व्यावसायिक नाट्यगृहांतही सादर केली. यातून मुलांची भरपूर करमणूक तर झालीच, पण मुलांचे नाटक कसे असावे? याचा धडा सुधाताईंनी संबंधितांना घालून दिला.
Share
Tweet
