Advertisement

मुंबईत रिक्षा चालक पुन्हा संपावर जाण्याची शक्यता

रिक्षाचालकांच्या मागण्या मान्य न झाल्यास तीव्र आंदोलन छेडण्याचा निर्णय या बैठकीत घेण्यात आला.

मुंबईत रिक्षा चालक पुन्हा संपावर जाण्याची शक्यता
SHARES

मुंबईतील रिक्षावाले पुन्हा एकदा आंदोलन करण्याच्या तयारीत आहेत. मुख्यमंत्री एकनाथ शिंदे यांनी रिक्षाचालकांच्या प्रलंबित मागण्यांसाठी बैठक घेऊन तोडगा न काढल्यास आंदोलन केले जाईल, असा इशारा ऑटो रिक्षा चालक-मालक संघटनेच्या कृती समितीने दिला आहे.

गिरगाव येथे मुंबई, कोकण, पश्चिम महाराष्ट्र, विदर्भ, मराठवाडा, खानदेशमधील रिक्षा संघटनेच्या पदाधिकाऱ्यांची बैठक झाली. रिक्षाचालकांच्या मागण्या मान्य न झाल्यास तीव्र आंदोलन छेडण्याचा निर्णय या बैठकीत घेण्यात आला.

अॅप आधारित अनधिकृत दुचाकी प्रवासी वाहतूक बंद करावी, रिक्षा चालक-मालकांसाठी परिवहन अंतर्गत कल्याणकारी मंडळ स्थापन करावे, या मंडळाकडून १० लाखांचे विमा संरक्षण असलेली वैद्यकीय गटविमा योजना सुरू करावी, मॅक्सी कॅबला परवानगी देऊ नये, वाहन विमा हफ्त्यांची रक्कम कमी करावी आदी मागण्या कृती समितीने केल्या आहेत.

या मागण्या पूर्ण करण्यासाठी मुख्यमंत्र्यांनी तातडीने बैठकीचे आयोजन करावे, अशी मागणी यावेळी करण्यात आली. कोरोना काळातील निर्बंधांमुळे रिक्षाचालक आर्थिक अडचणीत आले असून त्यांच्यावर कर्जाचा आणि व्याजाचा भार आहे. यामुळे रिक्षाचालकांमध्ये प्रचंड असंतोष असून त्याचे रूपांतर तीव्र आंदोलनात होऊ शकते, असा इशारा समितीचे अध्यक्ष शशांक राव यांनी दिला.



हेही वाचा

Mumbai Traffic Update: महापरिनिर्वाण दिनानिमित्त 5 ते 7 डिसेंबर दरम्यान मुंबईत वाहतुकीत बदल

समृद्धी महामार्ग: नागपूर-शिर्डी प्रवासात ९०० रुपये टोल

संबंधित विषय
Advertisement
‘मुंबई लाइव्ह’च्या ताज्या बातम्यांसाठी सब्स्क्राईब करा