रेल्वे रुळांलगत कचरा फेकून परिसर अस्वच्छ करणाऱ्यांना रेल्वेकडून नोटीस

रेल्वे रुळांलगत कचरा फेकून परिसर अस्वच्छ करणाऱ्यांवर जरब बसवण्यासाठी रेल्वे प्रशासनाकडून पुन्हा हालचाली सुरू करण्यात आल्या आहेत. रुळांलगतच्या परिसरात राहणाऱ्या ६५० नागरिकांना मध्य रेल्वेने नोटीस पाठवण्यास सुरुवात केली आहे. नोटीस कालावधी संपल्यानंतर नागरिकांकडून कचरा केल्यास मोठ्या रकमेच्या दंडाची तरतूद करण्यात येत आहे. यामुळे महापालिका निवडणुकांच्या तोंडावर कचरा पुन्हा पेटणार असल्याचे संकेत मिळत आहेत.

घरातील कचरा रेल्वे हद्दीत तसेच रुळांवर टाकल्याचा ठपका या नोटीसमध्ये ठेवण्यात आला आहे. रेल्वे हद्दीतील कचऱ्यामुळे रुळांशेजारी असलेल्या सांडपाण्याच्या वाहिन्यांमध्ये अडथळा होतो. अनेकदा लोकलसह मेल-एक्स्प्रेसच्या चाकांच्या मोटर आणि अन्य यंत्रांमध्ये प्लास्टिक आणि अन्य कचरा अडकतो. यामुळे रेल्वे वाहतुकीला अडथळा येतो.

'मध्य रेल्वेवरील मुख्य आणि हार्बर मार्गावरील १९ कचऱ्याच्या अतिसंवेदनशील जागा निश्चित करण्यात आल्या आहेत. यात मशिद, भायखळा, विक्रोळी आणि कांजुरमार्गदरम्यान दिवा-मुंब्रा, दिवा-कोपर या रेल्वे स्थानकांतील जागेचा समावेश आहे. रेल्वे सुरक्षा दलाच्या मदतीने कचरा टाकणाऱ्या ६५० कुटुंबीयांना नोटीस बजावण्यात आली आहे.

रुळांलगतच्या वसाहतीतून रेल्वे हद्दीत कचरा फेकणे हे रेल्वे आणि मुंबईकरांसाठी नवे नाही. कचरा फेकणाऱ्यांवर वचक ठेवण्यासाठी अनेकदा जनजागृती करण्यात आली. पत्रे उभारण्यात आले. मात्र त्यातून काहीही निष्पन्न झाले नाही. उलट रेल्वे हद्दीतील कचऱ्याच्या प्रश्न अधिकच बिकट होत गेला. याप्रकरणी मध्य रेल्वेकडून महापालिकेच्या अतिरिक्त आयुक्तांना अनेकदा पत्रव्यवहार करण्यात आला आहे. मात्र तात्पुरती कारवाई थंडावल्यानंतर पुन्हा रुळांवरील कचऱ्याची समस्या 'जैसे थे' होते.