सर जे जे रुग्णालयात ब्रिटिशकालीन भुयार आढळलं, त्यामध्ये...

मुंबईतील जे.जे. रुग्णालय (J J Hospital) परिसरात असणाऱ्या डी.एम. पेटीट नावाच्या साधारण 130 वर्षे जुन्या इमारतीमध्ये एक भुयार सापडलं. सदर भाग हा नर्सिंग क़ॉलेजचा आहे. पण, तिथं सापडलेल्या या भुयारामुळं आता अनेकांचीच उत्सुकता आणि कुतूहल शिगेला पोहोचलं आहे. 

बुधवारी रुग्णालय परिसराची पाहणी करत असताना निवासी वैद्यकिय अधिकाऱ्यांना संशयास्पद गोष्टीचा अंदाज आलाय ज्यानंतर त्यांनी कुतूहलाचा भाग म्हणून तिथे असणारं झाकण काढण्याचा प्रयत्न केला. झाकण निघताच तिथं काहीशी पोकळी असल्याचं त्यांना जाणवलं. 

सुरक्षा रक्षकांच्या सहाय्यानं पुढील पाहणी केली आणि तिथं असणाऱ्या भुयाराचा (Tunnel) थांगपत्ता लागला. हे भुयार साधार 200 मीटरचं असून, इमारतीचं आयुर्मान पाहता ते 130 वर्षे जुनं असल्याचं सांगण्यात आलं आहे. 

जे जे रुग्णालयाकडून आर्किओलॉजी डिपार्टमेंटला आणि स्थानिक प्रशासनाला भुयारबाबत कळवण्यात आलं आहे. हे भुयार डिलिव्हरी वॉर्ड ते चिल्ड्रन वॉर्डपर्यंत असल्याची माहिती रुग्णालयाच्या वतीने देण्यात आली आहे.

सर जे जे रुग्णालयाची वास्तू आणि सदरील भागामध्ये बऱ्याच ब्रिटीशकालीन (British) इमारती आहेत. त्यातच आता सापडलेलं भुयार पाहता आता मुंबई जिल्हाधिराऱ्यांकडे (Mumbai Collector) यासंदर्भातील माहिती सोपवण्यात आली आहे.

काही वर्षांपूर्वी सेंट जॉर्ज परिसरातही असंच भुयार सापडलं होतं. मुंबईत (Mumbai) अशा प्रकारचं भुयार सापडण्याची ही पहिलीच वेळ नाही. यापूर्वीची शहरातील काही भागांतून भुयारं, चोरवाटा सापडल्या होत्या. 

सर जे जे रुग्णालयाच्या इमारती 177 वर्षांपूर्वी बांधण्यात आल्या होत्या. सर जमशेदजी जिजीभॉय आणि सर रॉबर्ट ग्रँट यांच्या सहकार्याने या इमारती उभारण्यात आल्या आहेत.

16 मार्च 1838 रोजी जमशेदजी जिजीभॉय यांनी या वास्तूच्या बांधकामासाठी एक लाख रुपयांची देणगी दिली होती. त्यानंतर 30 मार्च 1843 रोजी ग्रँट मेडिकल कॉलेजची पायाभरणी झाली. तर 15 मे 1845 रोजी ग्रँट मेडिकल कॉलेज आणि सर जमशेदजी जिजीभॉय रुग्णालय वैद्यकीय विद्यार्थी आणि रुग्णांसाठी खुले झाले होते.