एका १६ वर्षीय मुलानं पबजी खेळण्यासाठी ऑनलाइन व्यवहाराद्वारे आपल्या आईच्या अकाऊंटमधून चक्क १० लाख रुपये खर्च केल्याचं समोर आलं आहे. या प्रकारामुळे आई-वडिलांनी फटकारल्यानंतर हा मुलगा जोगेश्वरी परिसरातील आपल्या घरातून पळून गेल्याची माहिती समोर येत आहे.

मुलाच्या वडिलांनी एमआयडीसी पोलीस ठाण्यात तो हरवल्याची तक्रार दाखल केली होती. त्यानंतर, पोलिसांनी गुरुवारी दुपारी अंधेरी इथल्या महाकाली लेणी परिसरात पळून गेलेल्या मुलाचा शोध घेऊन त्याला त्याच्या पालकांकडे पाठवलं आहे.

बुधवारी संध्याकाळी मुलाच्या वडिलांनी एमआयडीसी पोलीस ठाण्यात तो हरवल्याची तक्रार दाखल केली होती. त्यानंतर, पोलिसांनी अपहरणाचा गुन्हा दाखल करून त्याचा शोध सुरू केला. मुलाच्या वडिलांनी तपासादरम्यान पोलिसांना सांगितलं की, “माझ्या मुलाला गेल्या काही महिन्यांपासून पबजीचं अक्षरशः व्यसन लागलं होतं. त्याने मोबाईलवर खेळताना आईच्या बँक खात्यातून १० लाख रुपये खर्च केले. ऑनलाईन व्यवहाराची माहिती मिळाली तेव्हा आम्ही त्याला चांगलंच खडसावलं. त्यानंतर तो पत्र लिहून घर सोडून निघून गेला.”

गेल्या वर्षी ऑक्टोबर महिन्यात तामिळनाडूमध्ये पबजीच्या व्यसन असलेल्या एका १४ वर्षीय मुलानं आत्महत्या केली होती. या मुलाला त्याच्या पालकांनी पबजी खेळण्यापासून रोखल्यानंतर आत्महत्येसारखं टोकाचं पाऊल उचललं होतं.

तर गेल्या वर्षी सप्टेंबर महिन्यात पश्चिम बंगालमध्येही देखील असाच प्रकार घडला. पश्चिम बंगालमधील नादिया जिल्ह्यात एका २१ वर्षीय विद्यार्थ्यानं पबजी खेळू न शकल्यानं आत्महत्या केली होती. त्यावेळी पोलिसांनी सांगितलं होतं की, आयटीआयचा विद्यार्थी असलेला प्रीतम हलदर यानं चकदाह पोलीस स्टेशन हद्दीतील पूर्बा लालपूर इथल्या आपल्या राहत्या घरात आत्महत्या केली होती.

हेही वाचा

वस्तू हरवल्यास शपथपत्र न घेता तक्रार नोंदवा, पोलीस आयुक्तांचे आदेश

दोन डोस घेऊनही प्रमाणपत्रात एक डोस घेतल्याचं नमूद