मुंबई (mumbai) शहर भागात असलेल्या महत्त्वाच्या अशा सहा उड्डाणपुलांचे आयुर्मान पाहता त्यांची डागडुजी करण्याचा निर्णय मुंबई महापालिकेने (bmc) घेतला आहे. लालबाग, हिंदमाता या उड्डाणपुलांचा (bridge) यात समावेश आहे. या कामासाठी कंत्राटदाराची नियुक्ती करण्यात आली असून 15 कोटी रुपयांपेक्षा जास्त खर्च येणार आहे.
मुंबई महापालिकेने 2024-25 मध्ये रस्ते, वाहतूक आणि पूल विभागासाठी एकूण 12 हजार 110 कोटी रुपये 97 लाख रुपयांची तरतूद केली. यातील पूलकामासाठी 7 हजार 710 कोटी रुपये खर्च करण्याचा निर्णय घेतला.
यातील बहुतांश नवीन कामांसाठी निधी मंजूर केला गेला. 2025-26 च्या अर्थसंकल्पीय अंदाजात पूल विभागासाठी 8 हजार 238 कोटी 73 लाख रुपयांची तरतूद करण्यात आली आहे. त्यामुळे नवीन पुलांसह अस्तित्वात असलेल्या पुलांची डागडुजीची कामे हाती घेण्यात येणार आहेत.
यामध्ये मुंबई शहर भागातील जुन्या उड्डाणपुलांचा समावेश आहे. यामध्ये लालबाग, हिंदमाता, जगन्नाथ शंकरशेट (दादर टीटी) उड्डाणपूल, कविवर्य केशवसूत उड्डाणपूल, शीव रुग्णालय उड्डाणपूल, जीटीबीनगर आरओबी यांचा समावेश आहे.
या पुलांवरून गणेशोत्सव (ganesh festival) काळातही मोठ्या गणेशमूर्ती नेताना खबरदारी घेण्याचे आवाहन मुंबई महापालिका व वाहतूक पोलिसांकडून नेहमी होत असते. या पुलांवरील रस्त्यांची दुरवस्था झाली आहे. त्याचे फेरपृष्ठीकरण अत्यावश्यक आहे.
तसेच पुलांच्या खांबांसह अन्य दुरुस्तीकामे केली जाणार आहेत. यामुळे पुलांचे आयुर्मानही वाढेल, असे महापालिकेतील सूत्रांनी सांगितले. या कामासाठी निविदा काढण्यात आली होती. त्याला प्रतिसाद मिळाला आहे. यासाठी 15 कोटी 89 लाख 32 हजार रुपये खर्च येणार आहे. पुलांची कामे पावसाळा (rainy season) वगळून 15 महिन्यांत पूर्ण करण्याचे उद्दिष्ट आहे.
मुंबई शहरातील पुलांची अवस्था काही वेगळी नाही. 54 पुलांपैकी सात पुलांना मोठ्या दुरुस्तीची आणि 12 पुलांना किरकोळ दुरुस्तीची गरज आहे. पादचारी पूल, उड्डाणपूल, स्कायवॉक आदींच्या मोठ्या दुरुस्ती आवश्यक आहेत.
यासाठी अर्थसंकल्पात निधी मंजूर झाला असला, तरीही प्रत्यक्षात त्याची प्रक्रिया झटपट होणे गरजेचे आहे. हिमालय पूल दुर्घटनेनंतर महापालिकेने सर्व पुलांचे ऑडिट करण्याचा निर्णय घेतला होता. त्यानंतर अनेक उड्डाणपूल, पादचारी पुलांचे ऑडिट करून दुरुस्ती करण्यास सुरुवात करण्यात आली.
हेही वाचा
Share
Tweet
