राज्य निवडणूक आयोगाने (SEC) व्यक्त केलेल्या चिंतेनंतर बृहन्मुंबई महानगरपालिकेने (BMC) शहरभर मतदार सहाय्यता यंत्रणा सक्रिय केल्याचे समजते.

फोर्ट येथील मुख्यालयासह सर्व 24 विभागांमध्ये मतदार सहाय्यता केंद्रे (Voters Help Desks) उभारण्यात आल्याची माहिती देण्यात आली. नागरिकांच्या आक्षेपांची नोंद घेणे आणि त्यावर कार्यवाही करणे याची जबाबदारी सहाय्यक आयुक्तांवर सोपवण्यात आली आहे. संपूर्ण प्रक्रियेवर देखरेख झोनल उपायुक्तांकडून ठेवण्यात येणार असल्याचे सांगितले गेले.

ही पावले राज्य निवडणूक आयोगाने आठवड्याच्या सुरुवातीला जारी केलेल्या निर्देशांनंतर उचलण्यात आली असल्याचे कळते. मसुदा मतदार यादीत अनियमितता असल्याच्या आरोपांनंतर SEC ने हस्तक्षेप केला. 

त्यानुसार आक्षेप नोंदवण्याची अंतिम मुदत 27 नोव्हेंबरवरून 3 डिसेंबरपर्यंत वाढवण्यात आली. 28 नोव्हेंबरपर्यंत 2,082 आक्षेप दाखल झाल्याची माहिती देण्यात आली. ज्यावरून नागरिकांच्या चिंतेची व्याप्ती दिसून येते. मुंबईच्या मतदार यादीत तब्बल 11 लाखांहून अधिक डुप्लिकेट नोंदी असल्याचेही उघड झाले. तर शहरात एकूण 1.03 कोटी नोंदणीकृत मतदार आहेत.

या विसंगतींची पडताळणी करण्यासाठी घरी जाऊन तपासणी मोहीम करण्याचे नियोजन करण्यात आले. निवडणूक विभागाचे कर्मचारी घरभेटीद्वारे रहिवासी तपशीलांची पुष्टी करणार, डुप्लिकेट नोंदण्या ओळखणार आणि आवश्यक त्या ठिकाणी वॉर्ड बदल करणार.

या प्रक्रियेचे मार्गीकरण करण्यासाठी आयुक्त भूषण गगराणी यांच्या अध्यक्षतेखाली एका आढावा बैठकीचे आयोजन करण्यात आल्याचे सांगितले गेले. या बैठकीत निवडणूक विशेष अधिकारी यांनी मतदार सहाय्यता केंद्रे सुरु झाल्याची माहिती दिली. 

तसेच संशयित डुप्लिकेट नावे विभागीय कार्यालयांत उपलब्ध करून देण्यात येणार असल्याचे सांगितले. तसेच ज्या व्यक्तींच्या नोंदी संशयास्पद वाटतात त्यांच्याशी निवडणूक विभाग थेट संपर्क साधणार असल्याचेही कळवण्यात आले.

आक्षेप 3 डिसेंबर 2025 पर्यंत कार्यालयीन वेळेत दाखल करणे आवश्यक आहे. नागरिकांच्या तक्रारींची तपासणी करण्याचे आणि निर्णय घेण्याचे अधिकार सहाय्यक आयुक्तांना देण्यात आले आहेत. SEC च्या निर्देशांनुसार नावातील चुका, लिंग संबधी नोंदीतील त्रुटी, टायपिंगमधील चुका, चुकीची वार्ड नोंद अशा त्रुटी “मार्क कॉपी” मध्ये दर्ज करणे अनिवार्य आहे. मृत व्यक्तींची नावे तसेच पात्र नागरिकांची नावे वगळलेली आढळल्यास तीही नोंदवण्याचे आदेश देण्यात आले.

कोणतीही चूक नागरिकांनी निदर्शनास आणून दिल्यास ती तातडीने दुरुस्त करण्याचे निर्देश देण्यात आले. अंतिम वॉर्डनिहाय यादी तयार करताना प्रत्येक मतदाराचा वॉर्ड क्रमांक योग्य असल्याची खात्री करणे आवश्यक आहे. चुकीच्या वॉर्डमध्ये असलेल्या नोंदी त्यांच्या योग्य वॉर्डमध्ये हलवणे बंधनकारक आहे, जेणेकरून अंतिम मतदार यादी अचूक आणि विश्वासार्ह राहील.

हेही वाचा

महाराष्ट्रात वाढत्या बिनविरोध निवडणुका चिंतादायक: सुप्रिया सुळे

भाजप पालिका निवडणुकीसाठी 40% तरुण उमेदवारी देणार