मध्य रेल्वेच्या कसारा मार्गावर प्रवास करणाऱ्या प्रवाशांसाठी महत्त्वाची बातमी आहे. टिटवाळा स्थानकातील प्लॅटफॉर्मचा विस्तार करून तो 15 डब्यांच्या लोकलसाठी योग्य करण्याचे काम हाती घेण्यात येणार आहे. त्यामुळे 28 ऑगस्ट/29 ऑगस्ट ते 11 सप्टेंबर/12 सप्टेंबरदरम्यान सलग 15 रात्री रेल्वे वाहतुकीवर परिणाम होणार आहे.

पहिला टप्पा 28 ऑगस्टपासून

कामाच्या पहिल्या टप्प्यात 28 ऑगस्ट/29 ऑगस्ट ते 1 सप्टेंबर/2 सप्टेंबर दरम्यान दररोज रात्री 11.30 ते पहाटे 5.10 वाजेपर्यंत, तब्बल 5 तास 40 मिनिटांचा ब्लॉक घेण्यात येणार आहे.

हा ब्लॉक कल्याण ते वासिंददरम्यान अप आणि डाउन नॉर्थ-ईस्ट मार्गावर असेल. त्यामुळे टिटवाळा ते कसारा दरम्यानच्या उशिरा रात्री आणि पहाटेच्या लोकल सेवांवर मोठा परिणाम होणार आहे.

28 ऑगस्ट/29 ऑगस्टच्या रात्री अनेक CSMT-टिटवाळा आणि CSMT-कसारा लोकल रद्द करण्यात येणार आहेत. काही लोकलचे मार्गही कमी करण्यात येणार आहेत.

CSMT-असणगाव लोकल रात्री 8.56 वाजता सुटल्यानंतर टिटवाळा येथेच थांबवण्यात येईल. तर रात्री 10 वाजण्याच्या सुमारास सुटणाऱ्या डोंबिवली-CSMT आणि कल्याण-CSMT लोकल ठाण्यापर्यंतच धावतील.

ब्लॉकपूर्वी कसाऱ्यासाठीची शेवटची लोकल CSMTहून रात्री 10.47 वाजता सुटणार आहे. ब्लॉकनंतर CSMTहून पहिली लोकल पहाटे 4.19 वाजता, तर कसारा-CSMT पहिली लोकल पहाटे 3.51 वाजता सुटणार आहे.

टिटवाळ्याऐवजी असणगावपर्यंत लोकल

29 ऑगस्ट/30 ऑगस्ट ते 1 सप्टेंबर/2 सप्टेंबर या कालावधीतही अनेक लोकल रद्द किंवा शॉर्ट-टर्मिनेट केल्या जाणार आहेत.

या काळात टिटवाळ्यापर्यंत जाणाऱ्या सर्व लोकल असणगावपर्यंत वाढवण्यात येतील, तर टिटवाळ्याहून सुटणाऱ्या काही लोकल असणगावहून सुरू होतील. काही सेवा ठाणे किंवा कल्याणपर्यंतच मर्यादित राहतील.

AC लोकलवरही परिणाम

या ब्लॉकचा परिणाम काही दिवसाच्या सेवांवरही होणार आहे.

CSMT-टिटवाळा सकाळी 6.30 वाजताची AC लोकल आणि दादर-टिटवाळा दुपारी 3.33 वाजताची AC लोकल ठाण्यापर्यंतच धावणार आहे.

याशिवाय इतर काही CSMT-टिटवाळा लोकल ठाणे किंवा कल्याणपर्यंतच धावतील, तर टिटवाळा-CSMT सेवांपैकी काही लोकल ठाणे किंवा कल्याणहून सुरू केल्या जातील.

मेल-एक्स्प्रेस गाड्यांनाही विलंब

ब्लॉकचा परिणाम मेल आणि एक्स्प्रेस गाड्यांवरही होणार आहे. काही गाड्या वासिंद किंवा आटगाव येथे नियंत्रित केल्या जातील.

गोरखपूर-दादर आणि बलिया-दादर एक्स्प्रेससह काही गाड्यांना मार्गात थांबवण्यात येणार आहे. तर ज्ञानेश्वरी एक्स्प्रेस, शालीमार-LTT एक्स्प्रेस, हावडा-CSMT मेल आणि मऊ-LTT एक्स्प्रेस मुंबईत नियोजित वेळेपेक्षा सुमारे 10 ते 20 मिनिटे उशिरा पोहोचण्याची शक्यता आहे.

मध्य रेल्वेच्या मते, प्लॅटफॉर्म विस्ताराचे हे काम पायाभूत सुविधा आणि प्रवाशांच्या सुरक्षेच्या दृष्टीने आवश्यक आहे. 1 सप्टेंबर/2 सप्टेंबरनंतरच्या उर्वरित ब्लॉकची माहिती स्वतंत्रपणे जाहीर केली जाणार आहे.

त्यामुळे कसारा, टिटवाळा, आसनगाव, कल्याण आणि ठाणे मार्गावरील प्रवाशांनी रात्री आणि पहाटेच्या प्रवासाचे नियोजन करताना रेल्वेचे वेळापत्रक तपासूनच प्रवास करावा.

हेही वाचा

ईद-ए-मिलाद मिरवणुकीच्या पार्श्वभूमीवर ठाण्यात वाहतुकीत मोठे बदल