मध्य रेल्वेत बिनातिकीट प्रवास करणाऱ्यांमध्ये वाढ

मध्य रेल्वेच्या (Central Railway) मुंबई विभागाने एप्रिल 2026 मध्ये तिकीट तपासणी मोहिमेतून विक्रमी दंड वसुली करत नवा उच्चांक प्रस्थापित केला आहे. या महिन्यात तब्बल 16.13 कोटी रुपयांची वसुली करण्यात आली आहे. मे 2023 मधील 14.50 कोटींचा जुना विक्रम मोडीत निघाला आहे.

अधिकाऱ्यांच्या माहितीनुसार, एप्रिल 2026 मध्ये सुमारे 2.27 लाख बिनातिकीट किंवा नियमबाह्य प्रवासाचे प्रकार आढळून आले. मागील वर्षी एप्रिल 2025 मध्ये ही संख्या 1.45 लाख होती, म्हणजेच यावर्षी 56 टक्क्यांची वाढ झाली आहे.

दंड वसुलीतही मोठी वाढ झाली असून, गेल्या वर्षीच्या 6.07 कोटींच्या तुलनेत यावर्षी 16.13 कोटी रुपये वसूल करण्यात आले. म्हणजेच 166 टक्क्यांची वाढ नोंदवली गेली आहे. विशेषतः सेकंड क्लास डब्यांमध्ये सर्वाधिक उल्लंघन आढळून आले.

सेकंड क्लासमध्ये सुमारे 1.58 लाख प्रकरणे नोंदवली गेली, जी मागील वर्षाच्या तुलनेत 50 टक्क्यांनी अधिक आहेत. या प्रकरणांतूनच 13.06 कोटी रुपयांची वसुली झाली, जी मागील वर्षी 5.03 कोटी होती.

एसी लोकल ट्रेनमध्येही विशेष तपासणी मोहीम राबवण्यात आली. यात 12,698 नियमबाह्य प्रवासाची प्रकरणे नोंदवली गेली, जी मागील वर्षाच्या तुलनेत 22 टक्क्यांनी अधिक आहेत. या विभागातून 39.66 लाख रुपयांची वसुली झाली.

याशिवाय,

• फर्स्ट क्लासमधील 11,877 प्रकरणांतून 3.79 कोटी रुपये वसूल

• मेल आणि एक्सप्रेस गाड्यांमधील 35,785 भाडे फरक प्रकरणांतून 2.20 कोटी रुपये

• अनबुक्ड सामानाच्या 8,723 प्रकरणांतून 9.95 लाख रुपये वसूल

रेल्वे अधिकाऱ्यांनी सांगितले की, बिनतिकीट प्रवास रोखण्यासाठी सतत आणि अचानक तपासणी मोहीम राबवल्या जात आहेत. यामुळे केवळ दंड वसुलीच नव्हे, तर प्रवाशांमध्ये शिस्त, सुरक्षितता आणि प्रवासाचा दर्जा सुधारण्यास मदत होत आहे.