प्रतिवर्षाप्रमाणे गुढीपाडव्यानिमित्त मुंबईच्या विविध भागात जोरदार नववर्ष स्वागत यात्रा निघणार आहेत. गिरगाव, कुर्ला, दादर, वरळी येथे स्वागतयात्रांची तयारी जोरदार सुरू आहे.
नवशक्तीने दिलेल्या वृत्तानुसार, चैत्र शुद्ध प्रतिपदा शालिवाहन शके 1948 रोजी गिरगावातील फडके श्रीगणपती मंदिरापासून मराठी नववर्ष स्वागत यात्रा अर्थात गिरगावचा पाडवा मोठ्या जल्लोषात साजरा केला जाणार आहे.
स्वामी विवेकानंद युवा प्रतिष्ठान आयोजित यात्रेचे हे 24 वे वर्ष आहे. वंदे मातरमच्या 150 व्या वर्षानिमित्त ‘वंद्य वंदे मातरम’ अशी यंदाच्या यात्रेची वैशिष्ट्ये आहेत.
यात्रेचा प्रारंभ सकाळी 8 वाजता वि. प. मार्ग, गिरगावच्या फडके श्रीगणपती मंदिरापासून राज्याचे सांस्कृतिक मंत्री अॅड. आशिष शेलार, कौशल्य विकास मंत्री मंगल प्रभात लोढा आणि महापौर रितू तावडे यांच्या हस्ते गुढीपूजनाने होईल.
ठाकूरद्वार नाका येथे आयोजित केलेल्या संकल्प सभेत चाणक्य मंडळ परिवाराचे अविनाश धर्माधिकारी आणि सुप्रसिद्ध गायक आणि संगीतकार पद्मश्री शंकर महादेवन हे प्रमुख अतिथी म्हणून उपस्थित असतील.
अंधेरी (पूर्व) येथे हिंदू नववर्षाचे स्वागत अत्यंत उत्साहात व पारंपरिक पद्धतीने करण्यात येणार आहे. यंदा प्रथमच ‘अंधेरीचा पाडवा’ या नावाने भव्य उत्सवाचे आयोजन करण्यात आले आहे.
या निमित्ताने 35 गुढ्या उभारून नववर्षाचे स्वागत केले जाणार असून, आकर्षक व भव्य शोभायात्रेचे आयोजन करण्यात आले आहे.
हिंदू नववर्ष स्वागतयात्रा समिती, कुर्ला पश्चिमच्या नववर्ष स्वागतयात्रेमध्ये यंदा ‘स्वदेशी’चा जागर करण्यात येणार आहे.
टाळ-मृदूंग, लेझिम पथक आणि ढोल ताशांच्या गजरात निघणाऱ्या या नववर्ष स्वागतयात्रेत कुर्ला येथील नागरिक पारंपरिक वेशभूषेत सहभागी होणार आहेत.
यंदाच्या स्वागतयात्रेत चित्ररथ, जिवंत देखावे, फलक इत्यादी माध्यमांतून स्वदेशी जीवनशैलीचे महत्त्व सांगण्यात येणार आहे. भारतीय वातावरणाला अनुसरून पारंपरिक वेशभूषेचे महत्त्व दिले जाईल.
गोरेगावच्या श्री मंगलमूर्ती गणेशभक्त मंडळातर्फे गुढीपाडवानिमित्त ‘भव्य शोभायात्रा व श्रीं’चा पालखी सोहळा आयोजित केला आहे.
सकाळी 6.30 वाजता श्रीं ची आरती व 6.45 वाजता पालखी प्रस्थान सुरू होईल. या शोभायात्रेत वेषभूषा, दिंडी, झांज पथक, लेझीम व पारंपरिक लोककला सादर होणार आहेत.
हेही वाचा
Share
Tweet
