बृहन्मुंबई महानगरपालिकेने (BMC) १७ मे २०२० रोजी मुंबईतील कंटेन्मेंट/रेड (containment zones or red zones in Mumbai) झोनची अपडेटेड लिस्ट जारी केली आहे. या यादीनुसार मुंबईत आता ६७४ कंटेन्मेंट झोन आहेत. महापालिकेने १२ मे २०२० रोजी सादर केलेल्या यादीच्या (२,६४३ कंटेन्मेंट झोन) तुलनेत ही संख्या तब्बल ७५ टक्क्यांनी घटली आहे.
कंटेन्मेंट झोनची नवी व्याख्या
आतापर्यंत मुंबईतील कोणत्याही परिसरात कोरोना रुग्ण आढळला की तो भाग कंटेन्मेंट (प्रतिबंधित क्षेत्र) झोन म्हणून घोषीत केला करण्यात येत होता. त्यामुळे या ठिकाणी पालिकेची आरोग्य व प्रशासकीय यंत्रणा सज्ज ठेवावी लागायची. तसंच तिथं पोलीस बंदोबस्तही ठेवावा लागायचा. यासाठी मोठं मनुष्यबळ लागायचं. शिवाय कंटेन्मेंट झोनच्या वाढत्या आकड्यांमुळे मुंबईकरही धास्तावले होते.
पण मुंबई महापालिकेचे नवनियुक्त आयुक्त इक्बाल चहल यांनी कंटेन्मेंट झोनची नवी व्याख्या तयार केली आहे. त्यानुसार मुंबईत कुठेही कोरोनाचा एक-दोन रुग्ण आढळला तर तो भाग थेट कंटेन्मेंट झोन घोषित न करता त्या रुग्णाला तातडीने पालिकेच्या अलगीकरण कक्षात हलवण्याचा निर्णय मुंबई महापालिका प्रशासनाने घेतला आहे. त्यामुळे मुंबईतील कंटेन्मेंट झोनची संख्या घटली आहे.
हेही वाचा - केडीएमसी परिसरात ६ नवीन कोरोना रुग्ण, कंटेन्मेंट झोनची यादी बघा...
राज्यातील कोरोनाबाधित रुग्णांची एकूण संख्या ३३ हजार ५३ झाली असून मुंबईनेही २० हजारांचा (२०,१५०) आकडा पार केला आहे. रविवार १७ मे रोजी दिवसभरात २३४७ नवीन कोरोनाबाधित रुग्ण आढळून आले आहेत. राज्यात आढळून आलेल्या कोरोनाबाधितांची ही आतापर्यंतची सर्वाधिक संख्या आहे. राज्यात सध्या २४ हजार १६१ रुग्णांवर उपचार सुरू असल्याचं आरोग्यमंत्री राजेश टोपे यांनी सांगितलं.
मुंबईतील वाढत्या कोरोनाबाधितांच्या संख्येवर नियंत्रण ठेवण्यासाठी ७ झोन तयार करून प्रत्येक झोनची जबाबदारी एका आयएएस अधिकाऱ्यावर सोपवण्यात आली आहे.
हेही वाचा - मिरा-भाईंदरमध्ये कोरोना हाॅटस्पाॅट वाढले, बघा संपूर्ण कंटेन्मेंट झोन लिस्ट