मध्य, पश्चिम रेल्वेला रेल्वेलगतच्या नदी, नाल्यांची सफाई करण्याचे आयुक्तांचे आदेश

मुंबईत दरवर्षी जस्तीचा पाऊस पडल्यास रेल्वे वाहतूक विस्कळीत होते. तसंच, मुसळधार पावसात रेल्वे मार्गावरील कल्व्हर्ट भरल्यास रुळांवर अनेकवेळा पाणी तुंबून मुंबईची जीवनवाहिनी विस्कळीत होत असते. यंदा कोरोनाच्या पार्श्वभूमीवर मुंबईत लॉकडाउन सुरू आहे. त्यामुळं नालेसफाई, कल्व्हर्ट सफाईसाठी कमी अवधी उरला आहे. त्यामुळं पाणी उपसण्याचे पंप रेल्वे प्रशासनाच्या मागणीनुसार, २५ मेपर्यंत पुरविण्याचे आदेश आयुक्त इकबाल सिंग चहल यांनी पालिका अधिकाऱ्यांना दिले आहेत.

रेल्वे परिसरातील मान्सूनपूर्व कामांचा आढावा पालिका आयुक्तांनी शुक्रवारी एका विशेष बैठकीत व्हिडीओ कॉन्फरन्सिंगद्वारे घेतला. या बैठकीत मुंबईपुढे कोरोनाचे संकट, लॉकडाउन, मजुरांची कमतरता अशा अनेक अडचणी असल्या तरी पालिका आणि रेल्वे अधिकाऱ्यांनी समन्वयाने पावसाळापूर्व कामे पूर्ण करावीत, अशी सूचना आयुक्तांनी केली आहे.

बैठकीतील महत्त्वाचे मुद्दे

• मिठी नदीची सफाई तसेच माहिम येथे मिठी नदी ज्या ठिकाणी समुद्राला जाऊन मिळते, त्या भागाच्या रुंदीकरणाबाबत चर्चा करण्यात आली.
• ब्राह्मणवाडी नाला, कर्वेनगर नाला आणि टिळकनगर नाला यांच्यासह विविध नाल्यांची सफाई.
• नाली किंवा नदी सफाई करताना सदर ठिकाणी आवश्यकतेनुसार मनुष्यबळाचे नियोजन करून कामे निर्धारित वेळेतच पूर्ण होतील याकडे काटेकोरपणे लक्ष देणे.
• आवश्यकतेनुसार एका पाळीत काम करण्याऐवजी दोन किंवा तीन पाळ्यांमध्ये काम करवून घेणे.
• चुनाभट्टी, वडाळा आणि गोरेगाव येथील कल्व्हर्टच्या सक्षमीकरणासह इतर सर्व कल्व्हर्टची सफाई.
• पाणी उपसा करण्यासाठी ज्या ठिकाणी पंप बसविण्याचे निर्धारित करण्यात आले आहे, त्यासर्व ठिकाणी येत्या २५ मे २०२० पासून पंप बसवावेत.