4 एप्रिलपासून मिठी नदीच्या साफसफाईला सुरुवात होणार आहे. मिठी नदीची साफसफाई झाली नाही तर मुंबई जलमय होईल अशी हरकत स्थायी समितीच्या बैठकीदरम्यान नोंदवण्यात आली होती. या हरकतीनंतर खडबडून जागे झालेल्या प्रशासनाने निविदा प्रक्रिया राबवत कंत्राटदारांची नियुक्ती केली आहे.

18 मार्च रोजी स्थायी समितीच्या बैठकीत काँग्रेसचे गटनेते अश्रफ आजमी यांनी हरकतीचा मुद्दा उपस्थित करत मिठी नदीची सफाई झाली नाही तर मुंबई जलमय होईल, असा आरोप केला. त्यांच्या हरकतीच्या मुद्दय़ावर अतिरिक्त आयुक्त अभिजित बांगर यांनी स्थायी समितीत मिठी नदीच्या सफाईचे सादरीकरण केले.

त्यानंतर दोन कंत्राटदारांनी निविदेला प्रतिसाद दिला आहे. येत्या दोन दिवसांत त्यांची निविदा प्रक्रिया पूर्ण करण्यात येणार असून 4 एप्रिलपासून मिठी नदीतील गाळ उपसा करण्यास सुरुवात करण्यात येणार आहे.

या प्रकल्पाची किंमत 29.5 कोटी रुपये असून, गेल्या वर्षाच्या तुलनेत सुमारे 40% कमी आहे. एकूण 1.65 लाख मेट्रिक टन गाळ काढण्याचे उद्दिष्ट ठेवण्यात आले आहे.

‘पॅकेट C’ शुक्रवार उघडण्यात येणार असून आठवड्याच्या शेवटी कंत्राटदार यंत्रसामग्रीची तयारी सुरू करणार आहेत. 4 एप्रिलपासून मिठी नदीसह मुंबईतील सर्व मोठ्या आणि छोट्या नाल्यांचे गाळ काढण्याचे काम पूर्ण क्षमतेने सुरू होईल, अशी माहिती अतिरिक्त महापालिका आयुक्त अभिजीत बांगर यांनी दिली.

बांगर यांनी सांगितले की, मिठी नदीच्या गाळ काढण्याचे काम तीन पॅकेजमध्ये विभागले असून प्रत्येक पॅकेजसाठी दोन निविदा प्राप्त झाल्या आहेत आणि त्यांची छाननी सुरू आहे.

दरम्यान, मुंबईतील सातपैकी चार विभागांमध्ये मोठ्या आणि छोट्या नाल्यांचे काम आधीच सुरू झाले आहे. उर्वरित M-West, K-West, H-West आणि S या विभागांमध्ये टेंडर प्रक्रिया अंतिम टप्प्यात असून 27 मार्चपर्यंत काम सुरू होण्याची शक्यता आहे.

गेल्या पावसाळ्यात दोन कंत्राटदारांना काळ्या यादीत टाकल्यामुळे यंदा गाळ काढण्याचे काम उशिरा सुरू झाले. त्यानंतर नवीन कंत्राटदार नेमण्यासाठी पुन्हा टेंडर प्रक्रिया करावी लागली. मिठी नदी प्रकरणात आर्थिक गैरव्यवहाराच्या चौकशीमुळेही (Economic Offences Wing) कंत्राटदार मिळवण्यात अडचणी आल्या.

गेल्या वर्षी मिठी नदीचे गाळ काढण्याचे काम केवळ 70% पर्यंतच पूर्ण झाले होते, त्यामुळे अनेक भागात पाणी साचण्याच्या समस्या निर्माण झाल्या होत्या. मुसळधार पावसात मुंबईत पूरस्थिती टाळण्यासाठी मिठी नदीचे गाळ काढणे अत्यंत महत्त्वाचे मानले जाते.

हेही वाचा

भांडुप संकुलात 900 MLD क्षमतेचा पंप बसवणार