स्वच्छ सर्वेक्षण पुरस्कारामध्ये महाराष्ट्राला देशात प्रथम क्रमांक मिळाला आहे. यामध्ये पश्चिम महाराष्ट्राने बाजी मारली असून विदर्भ मात्र मागे राहिला आहे. नवी मुंबई हे देशातील तिसरे स्वच्छ शहर आहे तर पुणे देशातील दहाव्या क्रमांकाचे स्वच्छ शहर आहे.

केंद्रीय गृहनिर्माण आणि प्रशासकीय व्यवहार विभागाकडून 2023 मध्ये राबविण्यात आलेल्या स्वच्छ सर्वेक्षण अभियानातील विजेत्यांची नावे गुरुवारी जाहीर करण्यात आली.

नवी दिल्लीतील भारत मंडपम येथे झालेल्या समारंभात राष्ट्रपती द्रौपदी मुर्मू यांच्या हस्ते हे पुरस्कार प्रदान करण्यात आले. यावेळी नगरविकास विभागाचे प्रधान सचिव डॉ. के. एच. गोविंदराज आणि नवी मुंबई महापालिकेच्या वतीने आयुक्त राजेश नार्वेकर यांच्या हस्ते हा पुरस्कार प्रदान करण्यात आला.

यावेळी नगरविकास विभागाचे उपसचिव अनिरुद्ध जेवळीकर, स्वच्छ महाराष्ट्र मिशनचे संचालक नवनाथ वाठ उपस्थित होते. मुख्यमंत्री एकनाथ शिंदे यांनी राज्यातील जनतेचे, महानगरपालिका, सर्व नगर परिषदा आणि नगर पंचायतींचे अभिनंदन केले आहे. स्वच्छ सर्वेक्षणात महाराष्ट्राला प्रथमच प्रथम क्रमांक मिळाला आहे. गेल्या वर्षी मध्य प्रदेशने हा पुरस्कार पटकावला होता. स्वच्छ शहरांच्या यादीत इंदूर आणि सुरतला पहिले स्थान मिळाले आहे.

नवी मुंबई हे तिसऱ्या क्रमांकाचे स्वच्छ शहर ठरले आहे. त्यामुळे शहराने गेल्या वर्षी मिळवलेला ‘सेव्हन स्टार’ दर्जा कायम ठेवला आहे. देशातील केवळ तीन शहरांना सेव्हन स्टार दर्जा मिळाला आहे. यंदा पुणे आणि पिंपरी-चिंचवड या दोन शहरांना पंचतारांकित दर्जा मिळाला आहे. तर 28 शहरांना थ्री स्टार दर्जा मिळाला असून या गटात महाराष्ट्र राष्ट्रीय स्तरावर प्रथम क्रमांकावर आहे.

याशिवाय 81 शहरांना वन स्टार दर्जा मिळाला आहे. एक लाखापेक्षा कमी लोकसंख्या असलेल्या शहरांमध्ये सासवड देशात पहिल्या तर लोणावळा तिसऱ्या क्रमांकावर आहे. पश्चिम महाराष्ट्रातील गडहिंग्लज (25 ते 50 हजार लोकसंख्येची शहरे), कराड (50 हजार ते एक लाख लोकसंख्येची शहरे) आणि पाचगणी (15 हजारांपेक्षा कमी लोकसंख्या असलेली शहरे) या तीन शहरांना पुरस्कार मिळाला आहे.

याशिवाय विटा, देवळाली, सिल्लोड या शहरांनाही पुरस्कार मिळाले आहेत. मुख्यमंत्री शिंदे यांच्या ठाणे जिल्ह्यातील मीरा-भाईंदर (19), ठाणे (24), कल्याण-डोंबिवली (67) जिल्ह्यात फारशी कामगिरी झाली नाही. उपमुख्यमंत्री देवेंद्र फडणवीस यांची नागपूर महानगरपालिका ८६ व्या क्रमांकावर आहे. पनवेल (21), नाशिक (31), अहमदनगर (39), चंद्रपूर (48), सातारा (49), धुळे (57), छत्रपती संभाजीनगर (61), सोलापूर (63), वर्धा (66), बार्शी (88) , लातूर (93) शहरांनीही आपापल्या गटात पहिल्या 100 मध्ये स्थान मिळवले आहे.

हेही वाचा

कल्याण स्थानकाने पटकावला सर्वोत्तम स्वच्छ स्थानकाचा मान

मुंबई : बीएमसी गृहनिर्माण सोसायट्यांना मोफत डस्टबिनचे वाटप करणार