Advertisement

राज्यात तब्बल इतक्या जणांना म्युकरमायकोसिसची लागण

मुंबईत कोरोना पाठोपाठ आता म्युकरमायकोसिसचा ही धोका वाढत चालला आहे.

राज्यात तब्बल इतक्या जणांना म्युकरमायकोसिसची लागण
SHARES

मुंबईत कोरोना पाठोपाठ आता  म्युकरमायकोसिसचा ही धोका वाढत चालला आहे. राज्यभरात आतापर्यंत म्युकरमायकोसिसचे ३ हजार २०० रुग्ण आढळले आहेत. त्यामुळं नागरिकांमध्ये भीतीचं वातावरण निर्माण झालं आहे. शिवाय, या आजारावरील अॅम्फोटेरसीन-बी या इंजेक्शनची निर्मिती मुंबईतील हाफकिन बायोफार्मामध्येही सुरू करण्यात आली आहे.

६ जून रोजी पहिल्या ४० हजार इंजेक्शनची निर्मिती होणार असून त्याच सुमारास देशातील अन्य उत्पादक कंपन्यांकडूनही या इंजेक्शनचा पुरवठा होणार आहे. त्यामुळे त्यावेळी औषधांच्या तुटवड्याचा प्रश्न मिटणार असल्याचा दावा राज्य सरकारतर्फे गुरुवारी मुंबई उच्च न्यायालयात करण्यात आला. जून महिन्यात केंद्र सरकारकडून देशभरातील राज्यांना अॅम्फोटेरसीन-बीच्या ३ लाख ५२ हजार इंजेक्शन्सचा पुरवठा होणे अपेक्षित असल्याची माहिती केंद्र सरकारतर्फे देण्यात आली.

न्या. अमजद सय्यद व न्या. गिरीश कुलकर्णी यांच्या खंडपीठासमोर कोरोनाविषयक पुढील सुनावणीदरम्यान जनहित याचिकादार नीलेश नवलखा यांच्यातर्फे अॅड. राजेश इनामदार यांनी म्युकरमायकोसिसच्या (काळी बुरशी) भीषण संकटाकडे लक्ष वेधले. कित्येक रुग्णांचे कुटुंबीय अॅम्फोटेरसीन-बी हे इंजेक्शन मिळवण्यासाठी रडकुंडीला आले असल्याचे त्यांनी निदर्शनास आणले. तेव्हा, सध्या या इंजेक्शनचा तुटवडा असल्याचे राज्याचे महाधिवक्ता आशुतोष कुंभकोणी यांनी मान्य केले.

आजच्या घडीला दिवसाला १४ हजार इंजेक्शनची गरज असताना केवळ चार ते पाच हजार उपलब्ध होत आहेत. या इंजेक्शनच्या उत्पादनाला किमान २० दिवस लागतात, ही अडचण आहे. महाराष्ट्रातही हाफकिन बायोफार्मातर्फे याचे उत्पादन सुरू करण्यात आले आहे. त्यासाठी सर्व कच्चा माल मिळवण्यात आला आहे. ६ जून रोजी पहिल्या ४० हजार इंजेक्शनचे उत्पादन उपलब्ध होईल. परंतु, नियमाप्रमाणे केंद्रीभूत पुरवठा होणार असल्याने हे उत्पादन प्रथम केंद्र सरकारकडे जाऊन नंतर त्याचा पुरवठा राज्यांना होईल.

कोरोनातून मुक्त झालेल्या रुग्णांना हा आजार होण्याची दाट शक्यता असते, हे खरे असले तरी तीव्र मधुमेहील व इतरांनाही त्याची लागण होऊ शकते', अशी माहिती कुंभकोणी यांनी दिली.

देशभरात प्रामुख्याने महाराष्ट्र, गुजरात व कर्नाटकमध्ये म्युकरमायकोसिसचे रुग्ण आढळले आहेत. केंद्र सरकारकडून ११ मेपासून २६ मेपर्यंत अशा राज्यांना एकूण सुमारे ८० हजार इंजेक्शनचा पुरवठा झाला असून महाराष्ट्रात ४२ हजार ६९१ इंजेक्शनचा पुरवठा केला आहे. सध्या ७ कंपन्या या इंजेक्शनचे उत्पादन करत असून आणखी ५ कंपन्यांना परवानगी दिली आहे. त्याशिवाय आणखी इच्छुकांना अर्ज करण्याचे आवाहनही केले आहे. जूनच्या संपूर्ण महिन्यात देशभरात ३ लाख ५२ हजार इंजेक्शन्सचे वितरण होणे अपेक्षित आहे.

म्युकरमायकोसिसला अधिसूचित आजार जाहीर केल्याने राज्यभरात कुठेही रुग्ण आढळल्यास त्याची माहिती सरकारी आरोग्य यंत्रणेला देणे रुग्णालये व डॉक्टरांना बंधनकारक आहे. जेणेकरून राज्य सरकार आवश्यक उपाययोजना करू शकेल. राज्य सरकार याप्रश्नी गांभीर्याने पावले उचलत आहे', अशी ग्वाहीही कुंभकोणी यांनी यावेळी दिली.

अखेरीस 'हे संकटही गंभीर दिसत असल्याने त्वरेने उपाय आवश्यक आहेत', असे निरीक्षण नोंदवत पुढील सुनावणीत अधिक तपशील सादर करण्याचे निर्देश देऊन खंडपीठाने याप्रश्नी पुढील सुनावणी २ जून रोजी ठेवली.



हेही वाचा - 

दारू अवैध विकली जाते म्हणून बंदी उठवणं तर्कहीन- सुधीर मुनगंटीवार

चंद्रपूरमध्ये दारूबंदी उठवली, सामाजिक कार्यकर्त्यांचा विरोध

Read this story in English or हिंदी
संबंधित विषय
‘मुंबई लाइव्ह’च्या ताज्या बातम्यांसाठी सब्स्क्राईब करा