मुंबईत आगामी सण-उत्सवांच्या पार्श्वभूमीवर मुंबई पोलिसांनी शस्त्रे, स्फोटके आणि इतर धोकादायक वस्तू बाळगण्यावर निर्बंध घातले आहेत. हे निर्बंध 29 ऑगस्ट ते 27 सप्टेंबर 2026 या कालावधीत संपूर्ण मुंबईत लागू राहणार आहेत.

मुंबई पोलिसांच्या ऑपरेशन्स विभागाचे पोलीस उपायुक्त अकबर पठाण यांनी महाराष्ट्र पोलीस कायद्यानुसार हा आदेश जारी केला आहे. शहरातील सार्वजनिक शांतता आणि सुरक्षितता कायम ठेवण्यासाठी हा निर्णय घेण्यात आला आहे.

कोणत्या वस्तूंवर बंदी?

या आदेशानुसार सक्षम प्राधिकरणाची विशेष परवानगी नसताना नागरिकांना शारीरिक इजा होऊ शकणारी शस्त्रे किंवा वस्तू बाळगता येणार नाहीत.

यामध्ये 

• तलवार, भाला, चाकू आणि तत्सम शस्त्रे

• काठ्या आणि लाठ्या, काही परवानगीच्या प्रकरणांचा अपवाद

• स्फोटके आणि संक्षारक पदार्थ

• दगड किंवा फेकून इजा करता येणाऱ्या वस्तू

• प्रक्षेपक किंवा इतर वस्तू फेकण्यासाठी वापरता येणारी साधने

• इजा करण्याच्या उद्देशाने वस्तू जमा करणे किंवा तयार करणे

यांचा समावेश आहे.

याशिवाय सार्वजनिक सुव्यवस्था, सुरक्षितता, सभ्यता किंवा नैतिकतेवर परिणाम होऊ शकतो, असे पोलिसांना वाटणारी काही भाषणे, गाणी, संगीत, हावभाव, चित्रे, चिन्हे, फलक आणि पुतळे किंवा प्रतिकात्मक वस्तूंच्या सार्वजनिक प्रदर्शनावरही निर्बंध लागू आहेत.

कोणाला सूट?

सरकारी कर्मचारी किंवा सरकारी उपक्रमांमधील अधिकारी-कर्मचारी, ज्यांना अधिकृत कर्तव्यासाठी शस्त्र बाळगणे आवश्यक आहे, त्यांना या निर्बंधातून सूट देण्यात आली आहे.

तसेच काही खासगी सुरक्षा कर्मचारी, गुरखा आणि चौकीदारांना लाठी बाळगण्याची परवानगी आहे. मात्र, लाठीची लांबी 3.5 फुटांपेक्षा जास्त नसावी.

पोलिसांना कारवाईचे अधिकार

निर्बंधांचे उल्लंघन करून प्रतिबंधित शस्त्रे किंवा वस्तू बाळगणाऱ्या व्यक्तींना नि:शस्त्र करण्याचा अधिकार पोलिसांना देण्यात आला आहे.

पोलिस अधिकारी स्फोटके, संक्षारक पदार्थ, प्रक्षेपक आणि त्यासाठी वापरली जाणारी प्रतिबंधित साधनेही जप्त करू शकतात. जप्त केलेल्या वस्तू सरकारच्या ताब्यात कायमस्वरूपी जाऊ शकतात.

दहीहंडी आणि गणेशोत्सवाच्या पार्श्वभूमीवर निर्णय

हा आदेश 5 सप्टेंबरच्या दहीहंडी आणि 14 सप्टेंबरपासून सुरू होणाऱ्या 10 दिवसांच्या गणेशोत्सवाच्या पार्श्वभूमीवर महत्त्वाचा आहे.

गणेशोत्सवात मुंबईतील विविध भागांमध्ये मोठ्या प्रमाणावर गर्दी होत असल्याने शस्त्रे, स्फोटके किंवा धोकादायक वस्तूंमुळे अनुचित प्रकार घडू नयेत, यासाठी पोलिसांनी हे निर्बंध लागू केले आहेत.

29 ऑगस्टपासून 27 सप्टेंबरपर्यंत हे निर्बंध लागू राहणार असून, या काळात नियमांचे उल्लंघन करणाऱ्यांवर कायदेशीर कारवाई होऊ शकते.

महत्त्वाचे म्हणजे, 27 सप्टेंबरनंतर आदेशाची मुदत संपली तरी त्यादरम्यान झालेल्या गुन्ह्यांवरील तपास, जप्ती, दंड किंवा कायदेशीर कारवाई थांबणार नाही.

हेही वाचा

कसारा मार्गावर 15 रात्री रेल्वे ब्लॉक