मोहरममनिमित्त निघणाऱ्या ताजिया मिरवणुकांच्या पार्श्वभूमीवर मुंबई वाहतूक पोलिसांनी शुक्रवार, 26 जून रोजी धारावी, माहिम आणि सायन परिसरात तात्पुरते वाहतूक निर्बंध आणि मार्ग बदल लागू केले आहेत. हे निर्बंध दुपारी 3 ते रात्री 11.55 वाजेपर्यंत लागू राहणार आहेत. मिरवणुका सुरळीत पार पडाव्यात आणि नागरिकांच्या सुरक्षिततेच्या दृष्टीने हा निर्णय घेण्यात आला आहे.

ताजिया मिरवणुका 60 फूट रोड, 90 फूट रोड, माहिम-सायन लिंक रोड, संत रोहिदास मार्ग आणि परिसरातील अन्य रस्त्यांवरून जाणार असल्याने या भागांमध्ये वाहतुकीवर परिणाम होणार आहे.

कोणते रस्ते राहणार बंद?

1. सायन-माहिम लिंक रोड

एस. एल. रहेजा जंक्शन ते टी-जंक्शन दरम्यान सायन-माहिम लिंक रोड सर्व वाहनांसाठी बंद राहील.

पर्यायी मार्ग:

• एस. एल. रहेजा हॉस्पिटलहून टी-जंक्शनकडे जाणारी वाहने सेनापती बापट मार्ग – माहिम फाटक – मोरी रोड – माहिम जंक्शन – जनरल अरुण कुमार वैद्य मार्ग – माहिम कॉजवे – कलानगरमार्गे इच्छित स्थळी जाऊ शकतील.

• एस. एल. रहेजा हॉस्पिटलहून सायन हॉस्पिटलकडे जाणारी वाहने सेनापती बापट मार्ग – माहिम फाटक – मोरी रोड – माहिम जंक्शन – एल. जे. रोड – शोभा हॉटेल – टी. एच. कटारिया मार्ग – कुंभारवाडा जंक्शन – सुलोचना शेट्टी रोडमार्गे प्रवास करू शकतील.

• सायन हॉस्पिटलहून वांद्र्याकडे जाणारी वाहने कुंभारवाडा जंक्शन – टी. एच. कटारिया मार्ग – शोभा हॉटेल – एल. जे. रोड – माहिम जंक्शन – माहिम कॉजवे मार्गे पुढे जातील.

2. 60 फूट रोड

सेंट कबीर मार्ग (60 फूट रोड) हा केमकर जंक्शन ते कुंभारवाडा जंक्शन दरम्यान बंद राहणार आहे.

पर्यायी मार्ग:

• केमकर जंक्शनहून सायन हॉस्पिटलकडे जाणारी वाहने सेनापती बापट मार्ग – माहिम फाटक – मोरी रोड – माहिम जंक्शन – एल. जे. रोड – शोभा हॉटेल – टी. एच. कटारिया मार्ग – कुंभारवाडा जंक्शन – सुलोचना शेट्टी रोडमार्गे जातील.

• सायन हॉस्पिटलहून वांद्रा किंवा दादरकडे जाणारी वाहने कुंभारवाडा जंक्शन – टी. एच. कटारिया मार्गाचा वापर करतील.

3. 90 फूट रोड

के. के. कृष्णन मेनन मार्ग (90 फूट रोड) हा अशोक मिल नाका ते कुंभारवाडा जंक्शन दरम्यान वाहतुकीसाठी बंद राहणार आहे.

पर्यायी मार्ग:

• अशोक मिल नाकाहून कुंभारवाड्याकडे जाणारी वाहने संत रोहिदास मार्ग – पैलवान नरेश माने जंक्शन – सायन रेल्वे स्टेशन – सायन रोड क्रमांक 3 – वेद फाटक गोयल जंक्शन – डॉ. बाबासाहेब आंबेडकर रोड – सायन सर्कल – सायन हॉस्पिटल जंक्शन – सुलोचना शेट्टी रोडमार्गे पुढे जातील.

• कुंभारवाडाहून अशोक मिल नाक्याकडे जाणारी वाहने सुलोचना शेट्टी रोड – सायन हॉस्पिटल जंक्शन – डॉ. बाबासाहेब आंबेडकर रोड – सायन सर्कल – वेद फाटक गोयल जंक्शन – सायन रोड क्रमांक 3 – पैलवान नरेश माने जंक्शन – संत रोहिदास मार्गमार्गे प्रवास करतील.

वाहतूक पोलिसांचे आवाहन

हे वाहतूक निर्बंध मोटार वाहन कायदा, 1988 मधील कलम 115 अंतर्गत लागू करण्यात आले आहेत. वाहतूक पोलिसांनी नागरिकांना प्रवासाचे नियोजन आधीच करण्याचे तसेच पर्यायी मार्गांचा वापर करण्याचे आवाहन केले आहे, जेणेकरून वाहतूक कोंडी टाळता येईल.

हेही वाचा

वाढवण बंदरासाठी 208 खारफुटींवर कुऱ्हाड