सँडहर्स्ट रोड रेल्वे अपघाताला पाच दिवस उलटल्यानंतरही सरकारी रेल्वे पोलीस (GRP) यांनी अद्याप या प्रकरणात गुन्हा दाखल केलेला नाही. अधिकाऱ्यांनी सांगितले की, जखमी प्रवासी आणि साक्षीदारांचे जबाब नोंदवले जात आहेत. मात्र सूत्रांच्या माहितीनुसार, अद्याप कोणत्याही रेल्वे कर्मचाऱ्यांचे जबाब घेण्यात आलेले नाहीत.

फ्री प्रेस जर्नलने यापूर्वी दिलेल्या वृत्तानुसार, जीआरपीने या प्रकरणात “वेट अँड वॉच”ची भूमिका घेतली आहे. सर्व पुरावे आणि साक्ष तपासल्यानंतरच पुढील कारवाई केली जाईल, असे अधिकाऱ्यांनी सांगितले.

6 नोव्हेंबर रोजी सँडहर्स्ट रोड रेल्वे स्थानकावर झालेल्या या अपघातात दोन प्रवाशांचा मृत्यू झाला. तर तीन जण जखमी झाले. या घटनेनंतर रेल्वे कर्मचाऱ्यांनी आंदोलन केले होते. कारण जीआरपीने याआधी 9 जूनला मुंब्रा येथे झालेल्या अपघातप्रकरणी (ज्यात पाच जणांचा मृत्यू झाला होता) दोन मध्य रेल्वे अभियंत्यांवर एफआयआर दाखल केला होता.

या पार्श्वभूमीवर सेंट्रल रेल्वे मजदूर संघटनेने सीएसएमटी येथे निदर्शन केले, आणि मोटरमन लॉबी अडवल्याचा आरोपही झाला, ज्यामुळे रेल्वे सेवा काही काळ ठप्प झाली.

आरोपांबाबत कायदेशीर मत मागवले

पोलीस सूत्रांनी सांगितले की, रेल्वे ट्रॅकवर चालणे हा रेल्वे कायद्यानुसार गुन्हा आहे. त्यामुळे जीआरपी तपासात सावधगिरी बाळगत आहे. या प्रकरणात निष्काळजीपणा किंवा मनुष्यवधाचे आरोप लागू होऊ शकतात का, याबाबत कायदेशीर मत घेतले जात आहे.

जखमी प्रवाशाच्या नातेवाइकाने सांगितले, “पोलीसांनी माझा आणि माझ्या भावाचा जबाब घेतला.” त्याने पुढे सांगितले की, संपामुळे गाड्या बराच वेळ थांबल्या होत्या. त्यामुळे प्रवाशांना उतरावे लागले.
“कोणीही ट्रॅकवर चालायचे ठरवले नव्हते, पण परिस्थितीमुळे प्रवाशांना तसे करावे लागले,” असे त्याने स्पष्ट केले.

दरम्यान, जखमी प्रवासी हफिजा चौगले आता धोक्याबाहेर आहेत आणि उपचारांना प्रतिसाद देत आहेत. तिचा व्हेंटिलेटरही काढण्यात आला आहे, अशी माहिती तिचा मुलगा सैफ चौगले यांनी दिली.

हेही वाचा

15 डब्यांच्या लोकलसाठी 'या' स्थानकांचा विस्तार होणार

बीडीडी चाळ पुनर्विकास प्रकल्प रहिवाशांचे पार्किंगसाठी पत्र