मीरा रोडमधील जेपी नॉर्थ (JP North) निवासी संकुलात बांधकाम सुरू असलेल्या उंच इमारतीच्या 13 व्या मजल्यावरून टॉवर क्रेन कोसळल्याने एका 20 वर्षीय कामगाराचा मृत्यू झाला. तर अन्य तिघे जखमी झाले. गुरुवारी सायंकाळी घडलेल्या या दुर्घटनेमुळे परिसरात एकच खळबळ उडाली.
मृत कामगाराची ओळख मुजम्मिल खोखर अशी झाली आहे. जखमींना तातडीने जवळच्या रुग्णालयात दाखल करण्यात आले असून, त्यापैकी एकाची प्रकृती गंभीर असल्याची माहिती मिळाली आहे.
घटनेची माहिती मिळताच अग्निशमन दल, पोलीस आणि स्थानिक महापालिका प्रशासनाची पथके घटनास्थळी दाखल झाली. त्यांनी बचावकार्य राबवत जखमींना बाहेर काढून रुग्णालयात हलवले.
प्राथमिक माहितीनुसार, उंच इमारतीच्या बांधकामासाठी वापरली जाणारी टॉवर क्रेन अचानक 13 व्या मजल्यावरून खाली कोसळली. क्रेन खाली पडताना परिसरात पार्क केलेल्या सुमारे डझनभर वाहनांचे मोठे नुकसान झाले.
क्रेन कोसळण्याचे नेमके कारण अद्याप स्पष्ट झालेले नाही. या प्रकरणी पोलिसांनी गुन्हा नोंदवून तपास सुरू केला असून, बांधकामस्थळी सुरक्षा नियमांचे उल्लंघन झाले का, कंत्राटदार किंवा बांधकाम कंपनीचा निष्काळजीपणा होता का, याचा तपास केला जात आहे.
या दुर्घटनेनंतर मुंबई महानगर प्रदेशातील (MMR) उंच इमारतींच्या बांधकामस्थळांवरील सुरक्षेचा मुद्दा पुन्हा ऐरणीवर आला आहे. दोषींवर कठोर कारवाई करावी आणि भविष्यात अशा घटना टाळण्यासाठी बांधकामस्थळांवरील सुरक्षा व्यवस्थेचे सर्वंकष पुनरावलोकन करावे, अशी मागणी स्थानिक रहिवाशांनी केली आहे.
हेही वाचा
Share
Tweet
