मुंबईतील या समुद्रकिनारी आढळले एकाच दिवशी २ मृतदेह

मुंबईत समुद्रकिनारी एकाच दिवशी २ मृतदेह आढळल्याची धक्कादायक माहिती समोर येत आहे. गिरगाव चौपाटी आणि मलबार हिल येथील प्रियदर्शनी गार्डनजवळ एकाच दिवशी २ मृतदेह सापडले. बुडाल्याने त्यांचा मृत्यू झाल्याची प्राथमिक तपासातून समोर येत आहे.

परंतू, या आत्महत्या आहेत की हत्या, या दोन्ही मृतदेहांचा एकमेकांशी संबंध आहे का या दृष्टीने पोलिस तपास करीत आहेत. गिरगाव चौपाटीजवळ एक मृतदेह पाण्यात तरंगत असल्याची माहिती सोमवारी मध्यरात्रीनंतर अडीचच्या सुमारास पोलिसांना मिळाली. दादासाहेब भडकमकर मार्ग पोलिसांचे पथक घटनास्थळी पोहोचले आणि स्थानिक मच्छिमारांच्या मदतीने हा मृतदेह बाहेर काढला.

मृत व्यक्ती साधारण ५० ते ५५ वर्षे वयोगटातील असून अंगावर गडद लाल रंगाचे शर्ट आणि काळ्या रंगाचा मास्क आहे. पोलिसांनी मृतदेह रुग्णालयात शवविच्छेदनासाठी पाठविला. ओळख पटविण्यासारखे मृतदेहाजवळ काहीच सापडले नाही.

प्रियदर्शनी गार्डनच्या समुद्रकिनारीही मृतदेह तरंगत असल्याची माहिती स्थानिक लोकांनी दिली. मंगळवारी सकाळी साडेसातच्या सुमारास मलबार हिल पोलिसांनी मृतदेह पाण्याबाहेर काढला.

३० ते ३५ वर्षे वयोगटातील तरुणाचा हा मृतदेह असून त्याच्याजवळही ओळख पटेल, असे काहीच सापडले नाही. एकाच दिवशी काही वेळाने दक्षिण मुंबईच्या समुद्रकिनारी मृतदेह सापडल्याने या दोघांचा परस्परांशी संबंध आहे काय, याचा पोलिस शोध घेत आहेत.