मुंबईसह देशभरात ओमिक्रॉनचा प्रसार होण्यास सुरूवात झाली आहे. या पार्श्वभूमीवर आता ओमिक्रॉन संक्रमित देशांमधून मुंबईत येणाऱ्या प्रवाशांचा चाचणी अहवाल निगेटिव्ह आल्यानंतरही त्यांना ७ दिवस होमक्वारंटाइन व्हावं लागणार आहे.
या प्रवाशांवर पालिकेच्या वॉर्ड वॉर रुममार्फत दररोज ५ वेळा फोन करून व अचानक भेट देऊन लक्ष ठेवले जाणार आहे. या नियमांचे उल्लंघन करणाऱ्या प्रवाशाची रवानगी संस्थात्मक विलगीकरणात होईल, असा सक्त इशाराही पालिका प्रशासनानं दिला आहे.
दक्षिण आफ्रिका, युरोप आदी ओमायक्रॉन संक्रमित देशांमधून दररोज काही प्रवासी मुंबई विमानतळावर उतरत आहेत. मागील महिनाभरात सुमारे तीन हजार प्रवासी मुंबईत आले आहेत. त्यांची चाचणी सुरू असून आतापर्यंत एकूण १६ कोरोनाबाधित आढळून आले आहेत.
परदेशातून आलेला एकही प्रवासी पूर्ण चाचणी झाल्याशिवाय पालिकेच्या नजरेतून सुटू नये, यासाठी यंत्रणा सतर्क आहे. याबाबत आयुक्त इकबालसिंह चहल यांनी शनिवारी नियमावली जाहीर केली. ओमायक्रॉन संक्रमित देशातून आलेल्या प्रवाशांची वेगाने चाचणी केली जात आहे.
यापैकी आतापर्यंत कोरोनाबाधित ९ रुग्ण आढळून आले होते. यामध्ये आणखी ४ जणांची भर पडली आहे. एकूण १३ बाधित रुग्णांच्या संपर्कात आल्यानं ४ जणांना कोविड झाला आहे. त्यामुळं या सर्व बाधितांचे नमुने जिनोम सिक्वेन्सिंग चाचणीसाठी पाठविण्यात आले आहेत. याबाबतचा अहवाल दोन दिवसात अपेक्षित आहे.
मागील महिनाभरात ओमायक्रॉन संक्रमित देशातून ३,७६० प्रवासी मुंबईत आले आहेत. यापैकी २,७९४ प्रवाशांची कोविड चाचणी करण्यात आली आहे. यापैकी आतापर्यंत १३ जणांना कोविड झाला आहे. यात १२ पुरुष व एका महिला रुग्णाचा समावेश आहे तर, या रुग्णांच्या संपर्कात आल्याने चौघांना कोविडची लागण झाली आहे. पालिकेने नऊ रुग्णांची एस जीन चाचणी केली होती. यापैकी सात जणांची चाचणी निगेटिव्ह आल्याचं समजतं.
महापालिकेचा ॲक्शन प्लॅन
नव्या नियमावलीनुसार धोका अधिक (हायरिस्क) आणि धोक्याची शक्यता असलेले देश अशी विभागणी करण्यात आली आहे. ‘हायरिस्क’ देशांमध्ये दक्षिण आफ्रिका, बोस्वाना व झिम्बाबेचा समावेश आहे.
या देशांतून आलेल्या प्रवाशांचा कोविड चाचणी अहवाल निगेटिव्ह आला तरी त्यांना सात दिवस क्वारंटाइन केले जात आहे. आतापर्यंत १७ प्रवाशांना क्वारंटाइन करण्यात आले आहे. इतर देशांमधून आलेल्या प्रवाशांनाही होमक्वारंटाइन बंधनकारक आहे.
Share
Tweet
