वर्ल्ड कपवर सट्टा खेळणाऱ्या परराज्य टोळीचा पर्दाफाश

मुलुंड परिसरातील एका उच्चभ्रू वस्तीत काही जण पाकिस्तान-बांगलादेश सामन्यावर सट्टा लावत असल्याची माहिती मुलुंड पोलिसांना मिळाली होती. त्यानुसार मुलुंड पोलिस ठाण्याचे वरिष्ठ पोलिस निरीक्षक रवि सरदेसाई यांच्या मार्गदर्शनाखाली पोलिसांच्या पथकाने दोघांना अटक केली. त्याच्याजवळून पोलिसांनी ५ लॅपटाॅप, ११ मोबाइल फोन, ६ वायफाय डोंगल, २ डेबिटकार्ड, १५ हजार रोकड आणि दोन कार हस्तगत केल्या आहेत. हे दोघेही आॅनलाईन साईडद्वारे सट्टा लावत होते. तपासात या प्रकरणात अन्य काही आरोपींचा सहभाग निश्चित झाला. मात्र ते राजस्थानच्या उदयपूरमधून सट्टा खेळत होते. 

त्यानुसार मुलुंड पोलिसांनी त्या तिघांना उदयपूर येथून अटक केली आहे. या आरोपींवर यापूर्वीही अशा प्रकारच्या गुन्ह्यांची नोंद असल्याचा संशय पोलिसांना असून पोलिस त्या अनुषंगाने तपास करत आहेत. मुलुंड पोलिसांनी या आरोपींवर जुगार प्रतिबंध कायद्यांतर्गत गुन्हा नोंदवून त्यांना अटक केली असल्याची माहिती वरिष्ठ पोलिस निरीक्षक रवि सरदेसाई यांनी दिली.