मुंबई अग्निशमन दलाच्या माहितीनुसार, इमारतीच्या टेरेसवरील पॅरापेट भिंतीचा प्लास्टर आणि काँक्रीटचा काही भाग अचानक तुटून खाली रस्त्यावर पडला. त्यावेळी तेथून जात असलेल्या व्यक्तीच्या अंगावर हा तुकडा पडल्याने तो गंभीर जखमी झाला.
घटनेची माहिती मिळताच अग्निशमन दल, पोलीस आणि महापालिकेचे अधिकारी घटनास्थळी दाखल झाले. जखमी व्यक्तीला तातडीने जवळच्या रुग्णालयात दाखल करण्यात आले. मात्र डॉक्टरांनी त्याला मृत घोषित केले.
प्राथमिक तपासात हा काँक्रीटचा तुकडा इमारतीच्या टेरेसवरील कठड्याच्या भिंतीतून कोसळल्याचे समोर आले आहे. इमारतीची दुरवस्था, संरचनात्मक कमकुवतपणा किंवा देखभालीतील त्रुटी यामुळे ही दुर्घटना घडली का? याचा तपास सुरू आहे.
अपघातानंतर महापालिका अधिकाऱ्यांनी इमारतीची पाहणी केली असून सविस्तर स्ट्रक्चरल ऑडिट करण्यात येणार आहे. खबरदारीचा उपाय म्हणून इमारतीच्या आसपासचा परिसर सुरक्षित करण्यात आला आहे.
दरम्यान, पोलिसांनी आकस्मिक मृत्यूची नोंद (ADR) करून पुढील तपास सुरू केला आहे. मृत व्यक्तीची ओळख अद्याप अधिकृतपणे जाहीर करण्यात आलेली नाही.
मान्सूनच्या पार्श्वभूमीवर मुंबईतील जुन्या आणि उंच इमारतींच्या सुरक्षिततेचा प्रश्न पुन्हा ऐरणीवर आला असून, अशा इमारतींच्या नियमित देखभाल व संरचनात्मक तपासणीची गरज अधोरेखित झाली आहे.
हेही वाचा
Share
Tweet
