मुंबई विद्यापीठाच्या आणि संलग्न महाविद्यालयांमधील ज्या विद्यार्थ्यांनी अद्याप पदवी परीक्षा किंवा एटीकेटी परीक्षेसाठी अर्ज केला नाही, अशा विद्यार्थ्यांसाठी मुंबई विद्यापीठाने आणखी एक संधी दिली आहे. १८ सप्टेंबरपासून असे विद्यार्थी त्यांच्या महाविद्यालयामार्फत ऑनलाइन शुल्क भरून ऑनलाइन परीक्षा अर्ज भरू शकणार आहेत. परीक्षा प्रवेश अर्ज भरण्याची अंतिम मुदत २० सप्टेंबर २०२० पर्यंत आहे. त्यामुळे विद्यार्थ्यांकडे केवळ ३ दिवस हे अर्ज भरण्यासाठी आहेत.
मुंबई विद्यापीठाच्या नियमित थिअरी परीक्षा १ ते १७ ऑक्टोबर या कालावधीत तर प्रात्यक्षिक परीक्षा १५ सप्टेंबरपासून घेतल्या जाणार आहेत.
ज्या विद्यार्थ्यांनी काही कारणास्तव अद्याप पदवी किंवा एटीकेटी परीक्षेचे अर्ज भरले नसतील, त्यांनी या ३ दिवसांच्या मुदतीत महाविद्यालयामार्फत ते भरावं असं आवाहन राज्याचे उच्च व तंत्र शिक्षण मंत्री उदय सामंत यांनीही केलं असून, २० सप्टेंबर रोजी संध्याकाळी ५ वाजता मुंबई विद्यापीठाच्या संकेतस्थळावरील परीक्षा प्रवेश अर्ज भरण्याची लिंक आपोआप बंद होणार असल्यामुळे त्यानंतर अर्ज करता येणार नाही याची नोंद विद्यार्थी व महाविद्यालयांनी घ्यावी, असे आवाहन मुंबई विद्यापीठाच्या परीक्षा व मूल्यमापम मंडळाकडून करण्यात आलं आहे.
महाविद्यालयांना विद्यापीठाने जारी केलेल्या सूचनेनुसार महाविद्यालयांनी संबंधित विद्यार्थ्याचे छायाचित्र, स्वाक्षरी, नाव, माध्यम, परीक्षा केंद्र, विषय आदि माहिती बरोबर भरल्या आहेत, याची खात्री करूनच अर्ज इनवर्ड करावा. ही माहिती गुणपत्रिका आणि पदवी प्रमाणपत्र यासाठी वापरण्यात येणार आहे. प्रवेश अर्ज इनवर्ड झाल्यानंतर कोणतीही दुरुस्ती करता येणार नाही, याची नोंद घ्यावी, असे आवाहन विद्यापीठाने केले आहे.
अंतिम वर्ष परीक्षा घेऊन निकाल जाहीर करण्यासाठी महाराष्ट्रातील विद्यापीठांना ३१ ऑक्टोबरपर्यंतची मुदतवाढ मिळाली आहे. विद्यापीठ अनुदान आयोगाने याबाबत विद्यापीठाला पत्र लिहून ही परवानगी दिली आहे. या पत्रानुसार आता राज्यातील विद्यापीठांना ३१ ऑक्टोबरपर्यंत परीक्षा प्रक्रिया पूर्ण करावी लागणार आहे.
Share
Tweet
