शस्त्रक्रियेपूर्वी एक्स-रेसाठी रुग्णाला उभं राहणं शक्य नव्हतं. पण, त्यानंतर त्या आता आपल्या पायावर उभ्या असून चालू सुद्धा शकतात. आता काही काळ फिजिओथेरेपी आणि न्यूट्रिशन थेरपी सुरू आहे. वजनावर नियंत्रण ठेवण्याचा सल्ला दिला आहे. अपंगत्व येण्यापूर्वीच संधिवातावर उपचार करणं गरजेचं आहे. यापुढे त्यांची नियमितपणे शारीरिक स्थिती आणि आरोग्याची तपासणी आवश्यक आहे.- डॉ. कौशल मल्हान, वरिष्ठ नी आणि हिप सर्जन
गेल्या १५ वर्षांपासून अंथरुणाला खिळलेल्या ८१ वर्षांच्या आजी पुन्हा एकदा आपल्या पायावर चालू शकल्या. मुलुंडच्या फोर्टीस रुग्णालयाने त्यांच्या पायावर केलेल्या यशस्वी शस्त्रक्रियेमुळे हे शक्य झालं आहे.
इराकच्या वृद्ध सलिह यांच्या पायांमध्ये कोणत्याच हालचाली जाणवत नव्हत्या. लठ्ठपणा आणि चालू शकत नसल्यामुळे त्यांना रोजची कामंही करता येत नव्हती. त्यामुळे, त्या संपूर्णपणे परावलंबी होत्या. उपचार करून त्यांना पुन्हा चालता येण्यासाठी कुटुंबाने इराण, मिसर, तुर्की आणि लेबनन येथील डॉक्टरांचा सल्ला घेतला. पण, शेवटी मुंबईतच त्यांच्यावर उपचार करण्याचा निर्णय घेण्यात आला. त्यानुसार त्यांना मुलुंडच्या फोर्टीस रुग्णालयात दाखल करण्यात आलं. नुकतेच त्यांच्यावर शस्त्रक्रिया झाली. ज्यानंतर त्या पुन्हा एकदा आपल्या पायावर उभ्या राहू शकल्या.
टोटल नी रिप्लेसमेंट सर्जरी
इराणमधील डॉक्टरांनी रुग्णाचे वय, गुडघ्यांमधील व्यंग, उच्च रक्तदाब आणि लठ्ठपणा अशा विविध समस्या पाहता त्यांना बरं करण्यासाठी काहीच करता येऊ शकणार नसल्याचं सांगितलं. रुग्णाच्या पाठीच्या कण्याला संधीवाताचा त्रास झाला होता. पण, फोर्टीस रुग्णालयातील डॉ. कौशल मल्हान यांनी त्यांची तपासणी केली आणि त्यांच्या दोन्ही गुडघ्यांवर टोटल नी रिप्लेसमेंट सर्जरी (टीकेआर) करण्याचा सल्ला दिला.
त्यानंतर एकाच ठिकाणी बसलेल्या स्थितीत शस्त्रक्रिया करण्याचा निर्णय घेतला. सौम्य ऊतींचे नुकसान जलदपणे बरे होण्यामध्ये मदत करणारे ‘टिश्यू प्रिझर्व्हींग तंत्र’ वापरत डॉ. मल्हान यांनी मार्च महिन्याच्या अखेरीस ही शस्त्रक्रिया केली.
शस्त्रक्रियेदरम्यान कमकुवत हाडांना आधार देण्यासाठी मोठ्या आकाराचे बोन ग्राफ्ट्स बसवण्यात आले आणि त्यांच्या गुडघ्यांमध्ये धातू बसवण्यात आलं.
याविषयी, पायांच्या स्थितीमध्ये अचानक झालेला बदल पाहून काय वेगळे वाटते याबाबत आपल्याकडे बोलण्यासाठी शब्दच नसल्याची प्रतिक्रीया रुग्णानं दिली आहे. शिवाय, पायातील वेदना नाहीशा झाल्या आहेत, असं सलिह यांनी सांगितलं. रुग्णाला आता डिस्चार्ज देण्यात आला आहे आणि त्या वॉकरच्या मदतीने चालता येत आहे. मात्र त्यांना नियमितपणे फिजिओथेरेपी करावी लागणार आहे.