मुंबईतील कुर्ला येथे आणखी एक झिका रुग्ण आढळून आला आहे. कुर्ला येथे राहणाऱ्या १५ वर्षांच्या मुलीला झिका आजार झाल्याचे समोर आले आहे.
दरम्यान, 19 जुलै रोजी मुंबईतील चेंबूरमध्ये झिकाचा पहिला रुग्ण आढळला होता. झिका बाधित मुलीला 20 ऑगस्टपासून ताप आणि डोकेदुखीचा त्रास होत होता. सुरुवातीला तिच्यावर खासगी रुग्णालयात उपचार करण्यात आले.
तिला 5 सप्टेंबर रोजी सार्वजनिक रुग्णालयात दाखल करण्यात आले होते. या मुलीला झिका झाल्याचे लक्षात आल्यानंतर बृहन्मुंबई महानगरपालिकेने (BMC) ती राहत असलेल्या परिसरातील घरांचे सर्वेक्षण केले आहे. त्यात एकही नवीन संशयित किंवा तापाचा रुग्ण आढळला नाही. रुग्णाच्या इमारतीच्या परिसरात एडिस डास आढळून आले. तेथे डास नियंत्रणाचे उपाय राबविण्यात आले आहेत.
झिका रोग हा झिका विषाणूमुळे होणारा आजार आहे. हा रोग संक्रमित एडिस डासांमुळे पसरतो. एडिस डास डेंग्यू आणि चिकनगुनियाचा प्रसार करतात. हा आजार विषाणूजन्य असला तरी तो कोविड सारख्या वेगाने पसरत नाही.
झिका विषाणूची लागण झालेल्या सुमारे 80 टक्के लोकांना कोणतीही लक्षणे दिसत नाहीत. इतर आजार असलेल्या लोकांना गंभीर संसर्ग होण्याची शक्यता असते. अशा रुग्णाला हॉस्पिटलायझेशनची आवश्यकता असू शकते.
हेही वाचा
Share
Tweet
