भारतीय राष्ट्रीय महामार्ग प्राधिकरणाने (NHAI) तिसऱ्या मुंबई (mumbai) -पुणे द्रुतगती महामार्गाच्या (mumbai-pune expressway) प्रक्रियेला सुरुवात केली आहे.
या प्रकल्पामुळे दोन्ही शहरांमधील प्रवासाचा वेळ सुमारे 90 मिनिटांपर्यंत कमी होण्याची अपेक्षा आहे.
NHAI ने या प्रकल्पाचा सविस्तर प्रकल्प अहवाल (DPR) तयार करण्यासाठी आणि त्याची व्यवहार्यता चाचणी (feasibility study) करण्यासाठी निविदा मागवल्या आहेत.
मुंबई-पुणे (pune) द्रुतगती महामार्गाला समांतर अशा 130 किलोमीटर लांबीच्या या 'ग्रीनफील्ड' द्रुतगती महामार्गासाठी सुमारे 15,000 कोटी रुपयांचा खर्च अपेक्षित आहे.
या प्रकल्पाचा सविस्तर प्रकल्प अहवाल (DPR) तयार करण्यासाठी निविदा आमंत्रित करण्यात आल्या आहेत.
हा नवीन द्रुतगती महामार्ग आधुनिक सुरक्षा वैशिष्ट्यांनी सुसज्ज असलेला, 8 मार्गिकांचा (lane) एक वेगवान रस्ता असेल.
याची सुरुवात रायगड जिल्ह्यातील 'चौक' येथून होईल आणि तो JNPT कॉरिडॉरला जोडला जाईल. तिथून हा महामार्ग पुण्याच्या दिशेने पुढे जाईल आणि भोर तालुक्यातील 'शिवारे' गावापाशी संपेल, जिथे तो पुणे रिंग रोडशी जोडला जाईल.
हा महामार्ग पुणे आणि 'अटल सेतू' यांच्यामध्ये थेट संपर्क (connectivity) प्रस्थापित करेल, ज्यामुळे मुंबई, नवी मुंबई आणि जवाहरलाल नेहरू बंदरापर्यंत पोहोचणे अधिक सुलभ होईल.
सूत्रांनी दिलेल्या माहितीनुसार, NHAI ने या निविदा प्रक्रियेसाठी 24 जून ही अंतिम मुदत निश्चित केली आहे.
तसेच त्यानंतर कंत्राटदारांची नियुक्ती आणि तांत्रिक मंजुऱ्या मिळवण्याची प्रक्रिया वेगवान होण्याची अपेक्षा आहे.
या वर्षाच्या उत्तरार्धात प्राथमिक सर्वेक्षण आणि मार्गाची पाहणी करण्याची कामे सुरू होण्याची शक्यता आहे.
या नवीन मार्गामुळे सध्याच्या महामार्गावरील वाहतुकीचा ताण कमी होण्याची, तसेच पश्चिम महाराष्ट्रातील प्रमुख औद्योगिक आणि लॉजिस्टिक्स केंद्रांमधील संपर्क व्यवस्था अधिक बळकट होण्याची अपेक्षा आहे.
हा महामार्ग दररोज सुमारे तीन लाख वाहनांची वाहतूक हाताळण्यास सक्षम असेल.
तसेच, पुणे, मुंबई, नवी मुंबई, JNPT बंदर आणि इतर प्रमुख औद्योगिक पट्ट्यांदरम्यान होणाऱ्या मालवाहतुकीमध्ये (freight movement) यामुळे लक्षणीय सुधारणा होईल.
हेही वाचा
Share
Tweet
