काही कलाकार-तंत्रज्ञ एकमेकांचे मित्र असतात, पण त्यांना एकत्र काम करण्याची फार संधी मिळत नाही. या बाबतीत आदिती गोवित्रीकर लकी ठरली आहे. 'स्माईल प्लीज' या आगामी मराठी चित्रपटानं विक्रम फडणीससोबत काम करण्याची तिची इच्छा पूर्ण केली.
आदिती गोवित्रीकर हे मराठमोळं नाव आज संपूर्ण जगाला ठाऊक आहे. डाॅक्टर, अॅक्ट्रेस, माॅडेल असलेली आदिती २००० मध्ये मिसेस इंडिया बनली आणि खऱ्या अर्थानं नावारूपाला आली. आजवरच्या कारकिर्दीत हिंदी चित्रपटातही मोजक्याच भूमिका साकारणाऱ्या आदितीनं २००९ मध्ये संजय जाधवच्या 'रिंगा रिंगा' या चित्रपटाद्वारे मराठी सिनेसृष्टीत पदार्पण केलं. आता लवकरच ती विक्रम फडणीसच्या 'स्माईल प्लीज' या दुसऱ्या मराठी चित्रपटात झळकणार आहे.
विक्रम आणि अदितीची मैत्री खूप जुनी आहे. आपल्या कारकिर्दीतील दुसऱ्या मराठी चित्रपटात विक्रमसोबत काम करण्याची संधी मिळाल्याबाबत आदिती म्हणाली की, सुरुवातीच्या काळात विक्रम नृत्यदिग्दर्शक होता आणि त्याचे शोज मी आवर्जून पाहायचे. तेव्हापासून आमची मैत्री आहे. ज्यावेळी त्यानं 'हृदयांतर' हा चित्रपट केला, त्यावेळी भविष्यात त्याच्या चित्रपटाचा भाग व्हावा असं मला मनापासून वाटलं होतं. त्यानं मला 'स्माईल प्लीज' या चित्रपटासाठी विचारणा केली आणि माझी ही इच्छा लवकरच पूर्ण झाली.
मित्रासोबत काम करण्याच्या अनुभवाबाबत अदिती म्हणाली की, ओळखीच्या व्यक्तीसोबत काम करणं नक्कीच सोपं असतं. कारण त्यांना अपेक्षित असलेल्या गोष्टी आपल्याला ठाऊक असतात. त्यामुळं अभिनय करणं सहज शक्य होतं असं आदितीचं मत आहे. चित्रपटातील आपल्या भूमिकेविषयी अदिती म्हणाली की, या चित्रपटाचं कथानकच मुख्य हिरो आहे. कथानक अतिशय सशक्त असल्यानं हा चित्रपट नक्कीच उत्कृष्ट ठरेल. वैयक्तिक जीवनात मी डॉक्टर असून, पडद्यावरही डॉक्टरची भूमिका साकारली आहे. माझ्या शिक्षणाचा मला अभिनय करताना खूपच उपयोग झाला.
हेही वाचा -
शंकर महादेवन यांच्या गायनाचा 'मोगरा फुलला'