महिलांचे अनेक प्रश्न आजवर चित्रपटांतून हाताळलेले आहेत. तसेच मराठी चित्रपटसृष्टीत सध्या वेगवेगळ्या विषयांवर भाष्य करणारे सिनेमे सातत्याने येत आहेत. असाच स्त्रीची कथा प्रेक्षकांसमोर आणणारा ‘तुला पण बाशिंग बांधायचंय’ हा चित्रपट येत्या ३० मार्चला प्रेक्षकांच्या भेटीला येत आहे. स्वत:शी तडजोड करून संसार करणा-या अनेक महिलांच्या मनातील अस्वस्थता ‘तुला पण बाशिंग बांधायचंय’ या चित्रपटातून दाखवण्यात आली आहे.
वयात आलेल्या मुला-मुलींचं लग्न म्हणजे घरच्यांसाठी काळजीचा विषय असतो. ‘तुला पण बाशिंग बांधायचंय’ ही कथा आहे वर्षा आणि आकाश या तरुण जोडप्याची. एकमेकांच्या पसंतीने लग्न ठरलेल्या या दोघांच्या आयुष्याला लग्नानंतर अचानक कलाटणी मिळते. या कलाटणीनंतर वर्षा आणि आकाशचं आयुष्य कोणतं वळण घेतं, याची हृदयस्पर्शी कथा या चित्रपटातून पहायला मिळणार आहे. वैवाहिक आयुष्यातील समस्या, मुला-मुलींच्या अपेक्षा, त्यांच्या आई-वडिलांचे दृष्टिकोन यासोबत समाजाची मानसिकता या सगळ्यांवर चित्रपटात भाष्य करण्यात आले आहे.
विक्रम गोखले, यतिन कार्येकर, सुनील गोडबोले, भक्ती चव्हाण, श्वेता खरात, सुवर्णा काळे असे दिग्गज कलाकार या चित्रपटात आहेत. येत्या ३० मार्चला हा चित्रपट प्रेक्षकांच्या भेटीला येत आहे.
हेही वाचा
असा आहे धकधक गर्लचा 'बकेट लिस्ट'!