काँग्रेसच्या पहिल्या यादीत ‘नातीगोती’

मुंबई - काँगेसच्या पहिल्या यादीत माजी नगरसेवक राजेंद्र चौबे यांचा मुलगा अभयकुमार चौबे याला वॉर्ड नं 3 मधून तर संजय निरुपम यांच्या जवळच्या वर्तुळात असलेले अशोक सुत्राळे यांचा मुलगा लौकिक सुत्राळे याला वॉर्ड नं 8 मध्ये उमेदवारी दिली आहे. अशोक सुत्राळे यांनी विधानसभा निवडणूकही लढली होती. रश्मी मेस्त्री मागील महापालिकेमध्ये निवडणूक हरल्या होत्या यावेळीही त्यांच्यावर विश्वास दाखवून वॉर्ड नं 14 मधून उमेदवारी देण्यात आली आहे. शिवा शेट्टी यांनी आपल्या बहीण विजयलक्ष्मी शेट्टी यांच्यासाठी वॉर्ड नं.16 मधून तिकीट मिळविण्यात यश मिळविले. नारायण राणे यांचे समर्थक सुनील मानकर यांनी आपल्या पत्नी भूमी मानकर यांच्यासाठी वॉर्ड नं 25 तिकीट मिळविण्यात यश मिळाले आहे. काँग्रेसचे विद्यमान नगरसेवक योगेश भोईर यांना त्यांच्या पत्नीसाठी तिकीट पाहिजे होते, मात्र तिकीट मिळण्याची शक्यता मावळल्यामुळे योगेश भोईर यांनी पत्नीसह शिवसेनेमध्ये प्रवेश केला. वॉर्ड नं 18 मधून संजय निरुपम यांच्या जवळचे दिलीप पंडित यांना तिकीट देण्यात आली आहे. सोमवारी काँग्रेसमध्ये सामिल झालेले माजी पोलीस अधिकारी सुरेश मराठे वॉर्ड नं. 131 मधून तिकीट मिळाले. विद्यमान नगरसेवक ज्ञानराज निकम यांनी कन्या निकिता निकमसाठी 223 वॉर्डमधून तिकीट मिळविले. माजी नगरसेवक विनोद शेखर यांनी पत्नी सुषमा शेखर यांच्यासाठी वॉर्ड 226 मधून उमेदवारी मिळवली आहे.