महाविकास आघाडी सरकार ग्लोबल टेंडरकरता केंद्राकडे परवानगी मागत आहे आणि त्याचवेळी महापालिकेला (bmc) स्वतः मंजुरी देतंय ? यांचं गौडबंगाल काही कळत नाही! जनतेला दाखवण्याकरता ग्लोबल टेंडरचा फक्त फार्स सुरू आहे का ?, असा सवाल भाजपचे आमदार आणि विधान परिषदेतील विरोधी पक्षनेते प्रविण दरेकर यांनी उपस्थित केला आहे.
राज्य सरकारवर टीका करताना प्रविण दरेकर म्हणाले की, राज्य सरकार लसीकरणाच्या आपल्या जबाबदारीपासून दूर जाताना दिसत आहे. कारण १८ ते ४४ वयोगटातील लसीकरण राज्य सरकार करणार. लस विकत घेण्यासाठी चेक हातात तयार आहे, एकरकमी पैसे देणार. महाराष्ट्रातील लसीकरण पूर्णपणे मोफत करणार, अशा प्रकारची भूमिका मुख्यमंत्री आणि राज्य सरकारने घेतली आहे.
परंतु पुन्हा ही जबाबदारी केंद्र सरकारवर ढकलण्याचं काम राज्य सरकार करत आहे. लसींसाठी ग्लोबल टेंडर काढण्याच्या परवानगीकरीता राज्य सरकार पत्र लिहिणार आहे. एकिकडे आठवड्याभरापासून ग्लोबल टेंडरची प्रक्रिया सुरू केली, निविदा मागवल्या असं बोलत आहेत आणि आता पुन्हा केंद्राला पत्र लिहिणार. म्हणजे जनतेला मूर्ख बनवण्याचं काम हे सरकार करताना दिसत आहे, असा आरोप प्रविण दरेकर यांनी केला.
लसीकरणाच्या स्वतःच्या जबाबदारीपासून राज्य सरकार पळ काढत आहे. @CMOMaharashtra pic.twitter.com/6K3tf5vmF5
— Pravin Darekar - प्रविण दरेकर (@mipravindarekar) May 12, 2021
आतापर्यंत आवश्यक लसी राज्य सरकारने उपलब्ध करायला पाहिजे होत्या. अजूनही ते पत्रांचे खेळ खेळत आहेत. बाकीच्या राज्यांनी लसी बुक केल्या, पैसे पाठवले, मग तुमचा चेक कुठे अडकला आहे? अजूनही आम्ही केंद्राला पत्र लिहितोय, टेंडरच्या मागे आहोत, लसी शोधतोय, एकूणच हे भांबावलेलं सरकार आहे, अशा शब्दांत प्रविण दरेकर यांनी राज्य सरकारवर टीका केली आहे.
(pravin darekar slams maharashtra government on global tender for covid vaccine purchase)
हेही वाचा- वाशी, ऐरोली, नेरुळ पालिका रुग्णालयात म्युकरमायकोसिस आजारासाठी ओपीडी