गुजरात (gujrat) आणि राजस्थानला (rajasthan) जाणाऱ्या लांब पल्ल्याच्या गाड्या भाईंदर (bhayandar) स्थानकात थांबवण्यात (halt) येणार अशी माहिती केंद्रीय रेल्वे मंत्री अश्विनी वैष्णव (ashwini vaishnav) यांनी दिली आहे. भाईंदर मध्ये महायुतीचे उमेदवार नरेंद्र मेहता यांच्या प्रचारासाठी अश्विनी वैष्णव आले होते.

शहरातील हजारो प्रवाशांची होणारी गैरसोय नरेंद्र मेहता यांनी लक्षात आणून दिल्यानंतर रेल्वेमंत्र्यांनी हे आश्वासन दिले. मिरा-भाईंदर हे मुंबई (mumbai) लगतचे जलद गतीने विकसित होणारे शहर आहे. तसेच या शहराची लोकसंख्या 15 लाखांच्या जवळपास पोहचली आहे.

शहरात गुजरात व राजस्थान मधील नागरिकांची संख्या अधिक आहे. येथील नागरिकांना गावी जायचे असल्यास बोरिवली, दादर आणि मुंबई सेंट्रल रेल्वे स्थानकातून पहाटे मेल गाड्या पकडाव्या लागतात. यादरम्यान नागरिकांना संबंधित रेल्वे स्थानकापर्यंत पहाटे किंवा गर्दीच्या वेळी पोहचण्यासाठी मोठी कसरत करावी लागते.

शहरातील नागरिकांची होणारी गैरसोय लक्षात घेऊन नरेंद्र मेहता यांनी गुजरात आणि राजस्थानला गुजरात सुपर फास्ट, कर्णावती एक्सप्रेस, अहमदाबाद वंदे भारत, सौराष्ट्र मेल, जोधपुर एक्सप्रेस, सूर्यनगरी एक्सप्रेस, रणकपुर एक्सप्रेस आदी रेल्वे गाड्या भाईंदर रेल्वे स्थानकात थांबवण्याची मागणी केली.

यावर वैष्णव यांनी लवकरच गुजरात आणि राजस्थानला जाणाऱ्या सर्व गाड्या भाईंदर रेल्वे स्थानकात थांबवण्यासाठी आवश्यक कार्यवाही हाती घेणार असल्याचे सांगितले.